Vonar að stíflan á markaðnum muni brátt bresta

Seðlabankinn kynnti ný vaxtaviðmið fyrir helgi sem ætlað er að eyða óvissu á fasteignamarkaði vegna dóms Hæstaréttar í Vaxtamálinu svokallaða. Hagfræðingur hefur sagt viðmiðin óskýr en þar til í dag hefur verið óvíst hvernig viðskiptabankarnir muni bregðast við. 

Íslandsbanki kynnti rétt fyrir fréttir nýtt lánaframboð verðtryggðra lána og þá mun Arion banki kynna sitt í vikunni. Páll Pálsson fasteignasali segist vongóður um að óvissunni á markaðnum verði nú loksins eytt.

Hafi beinan hag að lausn

„Það kemur allavega einhver lausn á þessu og ég trúi því að þetta muni losa þá stíflu sem er á markaðnum,“ segir Páll. Enn sé margt á huldu hvað varði nýju vaxtaviðniðin og forvitnilegt verði að sá hvernig bankarnir bregðist við.

„Þeir hafa beinan hag að því sjálfir að finna einhverja góða lausn á þessu og af mínum samskiptum við þessa banka sem ég tengist hvað mest, er ég bjartsýnn að það komi lausn í vikunni en ég veit ekki hvernig lausnin verður og það er óvissan. Ég veit ekki hvernig þetta verður reiknað út en þeir hljóta að koma með lausn sem er hagkvæm fyrir alla, bæði bankana og neytendur.“

Tvö önnur vaxtamál gegn Arion banka og Landsbankanum eru á dagskrá Hæstaréttar í desember og byrjun janúar.

„Þetta verður einhverskonar skammtímalausn þar til dómurinn í desember kemur. Þá fara menn í að nota jólin og áramót, jafnvel byrjun janúar til þess að í raun og veru teikna upp nýja skilmála á sínum lánum sem verða til framtíðar.“

Núverandi ástand hafi orðið til þess að allir hafi haldið að sér höndum, líka seljendur.

„Þeir vilja sjá hvað gerist og ég vona svo innilega að það komi einhverjar raunhæfar, góðar lausnir sem leysa þetta vandamál. Í raun og veru er þetta ekki húsnæðisvandamál, þetta er fjármálavandamál og ég er sannfærður um það að hagsmunirnir fyrir alla eru svo ofboðslega miklir að hafa þetta kerfi í lagi.“