Byrjaði 18 ára í þjónustuverinu og hættir nú sem fram­kvæmda­stjóri

Í tilkynningu Nova þess efnis til Kauphallar segir að Þuríður láti af störfum um næstu mánaðarmót en muni áfram veita félaginu ráðgjöf og styðja við yfirstandandi verkefni.

Þuríður sé með B.Sc. í Rekstrarverkfræði og sé stjórnendamarkþjálfi frá Háskólanum í Reykjavík. 

Hún hafi hafið störf 18 ára gömul í þjónustuveri Nova, við stofnun félagsins, og hafi síðan sinnt margvíslegum verkefnum, meðal annars sem sölu- og þjónustustjóri, framkvæmdastjóri einstaklingssviðs, framkvæmdastjóri upplifunar og síðast sem framkvæmdastjóri markaðssóknar. 

Þuríður hafi setið í stjórn Lyfju á árunum 2018 til 2024 og sitji nú í stjórn Vís trygginga.

Tímabært að flytja að heiman

Í tilkynningunni er haft eftir Þuríði að hún sé ótrúlega stolt af árangrinum sem starfsfólk Nova hafi náð saman og því sem það hafi byggt upp. Það hafi alltaf haft óbilandi trú á því að hægt sé að gera hlutina öðruvísi, skemmtilegri og betur. 

„Það hefur verið lykillinn að okkar árangri og ég er mjög spennt fyrir því sem framtíðin ber í skauti sér – bæði fyrir mig og fyrir Nova. Það hefur verið algjörlega einstakt að fá að vera í hópi Nova dansaranna, að tilheyra stærsta skemmtistað í heimi allan þennan tíma, ástríðufullum hópi sem brennur fyrir árangri og gefst aldrei upp. Núna er réttur tími fyrir mig að flytja að heiman og stíga inn í nýjar áskoranir. Ég held áfram að hvetja Nova af hliðarlínunni og fylgjast með félaginu vaxa áfram, dafna og vinna stóra sigra í góðum höndum.“

Nýr kafli í sögu Nova

„Það er alltaf eftirsjá að frábæru fólki en Þuríður skilur eftir sig mikið og mikilvægt starf sem við búum að. Hún hefur verið lykilmanneskja í því að móta, hlúa að og auka viðskiptaánægju meðal viðskiptavina Nova með frábærum árangri. Nú þegar við hefjum nýjan kafla í sögu Nova og stígum næstu skref inn í framtíðina byggjum við á þeim góða grunni sem hefur gert Nova að því magnaða fyrirtæki sem það er í dag. Við óskum Þuríði alls hins besta og hlökkum til að fylgjast með henni takast á við næstu verkefni,“ er haft eftir Sylvíu Kristínu Ólafsdóttur, forstjóra Nova.