Byrjar af fítons­krafti: Með þrjá­tíu stig að meðal­tali í leik

Keflavík sigraði Ármann í Laugardalshöllinni í gær, 79-101, í 3. umferð Bónus deildar kvenna.

Sara var stigahæst í liði Keflavíkur með 27 stig. Hún hefur farið mikinn í stigaskori í upphafi tímabils. Hún hefur samtals skorað níutíu stig í leikjunum þremur, eða þrjátíu stig að meðaltali í leik.

Sara er næststigahæsti leikmaður deildarinnar á eftir Mörtu Hermida hjá Tindastóli. Hún er með 39,5 stig að meðaltali í fyrstu tveimur leikjum Stólanna.

Auk þess að skora þrjátíu stig er Sara með 8,0 fráköst og 4,0 stoðsendingar að meðaltali í leik í vetur. Framlagsstigin eru 31,7 að meðaltali í leik.

Sara hefur hitt úr 34 af 54 skotum sínum inni í teig (63 prósent), þremur af níu þriggja stiga skotum sínum (33,3 prósent) og nýtt þrettán af fjórtán vítaskotum sem hún hefur tekið (92,9 prósent).

Tvíburasystir Söru, Bríet Sif, átti einnig góðan leik gegn Ármanni í gær og skoraði sextán stig. Systurnar skoruðu því samtals 43 stig í leiknum, eða 43 prósent af stigum Keflavíkur.

Eftir að hafa tapað fyrir Val í 1. umferðinni, 79-88, hefur Keflavík unnið tvo leiki í röð, gegn Hamri/Þór og Ármanni. Næsti deildarleikur Keflvíkinga er gegn Íslandsmeisturum Hauka eftir viku.