Róbert Aron og Einar Örn taka við rekstri Kolaportsins

Í tilkynningu segir að þeir Róbert Aron og Einar Örn muni leggja áherslu á fjölbreyttan og lifandi markað sem skapi miðstöð mannlífs í miðborginni. Auglýst var eftir varanlegum rekstraraðilum í sumar og kemur fram í auglýsingu að alls hafi sex tilboð borist. Auglýst var þó að því gefnu að samningar næðust við ríkið um áframhaldandi húsaleigusamning á húsnæðinu, sem nú liggur fyrir.

Í tilkynningu segir að þeir Róbert Aron og Einar Örn ætli að byggja á arfleifð Kolaportsins sem markaðar, en þróa áfram til dæmis með sveigjanlegri opnunartíma og fjölbreyttri dagskrá. Þá ætla þeir að leggja áherslu á að Kolaportið verði vettvangur fyrir götulist.

Lagt verður upp með tvo til þrjá veitingastaði, kaffihús og bar, leiksvæði fyrir börn innandyra, matvöruverslun, matvörumarkað og endurbætt rými fyrir leigutaka svo eitthvað sé nefnt. Þá hafa aðilar á bakvið til að mynda Extraloppuna, Matarmarkað Íslands, Húrra Reykjavík og Iceland Airwaves sýnt áhuga á starfsemi í húsinu.

Götubiti ehf. skilaði samkvæmt tilkynningu borgarinnar hæsta leigutilboði auk þess sem matsnefnd mat tillögu þeirra, það er Róberts Arons og Einars Arnar, til flestra stiga. Borgarráð samþykkti drög að leigusamningi í dag og verður samningurinn tímabundinn til fimm ára með þriggja mánaða uppsagnarfresti á báða bóga. Mánaðarleiga verður 4.250.000 krónur.

Fengu flest stig

Róbert Aron Magnússon hefur verið leiðandi í matar- og pop up viðburðum á Íslandi undir formerkjum Götubita ehf og hefur sett upp veitingastaði í London og á Íslandi. Þá hefur hann sett upp fjölda tónleika og starfaði hjá Iceland Airwaves á árunum 2003 til 2012.

Einar Örn stofnaði Serrano skyndibitastaðina á Íslandi árið 2002 og hefur stofnað og rekið fjölda veitingastaða og mathalla erlendis, svo sem mexíkósku veitingastaðina Zócalo og STHLM mathöllina í Stokkhólmi.

Í auglýsingu borgarinnar um varanlegan rekstraraðila segir í tilkynningu horft hafi verið til niðurstöðuskýrslu starfshóps um almenningsmarkað í Reykjavík. Matsnefnd hafi farið yfir tilboð sem bárust og hafi leiguverð verið metið til 25 prósent stiga og aðrir matsþættir til 75 prósent stiga. Aðrir matsþættir hafi til að mynda verið farsæl reynsla af sambærilegum verkefnum, fjölbreytt vöruúrval á breiðu verðbili, svæði undir flóamarkað og viðburðasvæði. Þá var einnig horft til þess að áætluð starfsemi í húsnæðinu yrði góð viðbót við framboð á verslun og þjónustu sem fyrir er í miðbæ Reykjavíkur.