Ámálaða merkið þótti ekki nógu flott

„Okkur fannst málaða merkið ekki koma nægilega vel út og því ákváðum við að láta hreinsa málninguna af og setja upp skilti með merki bankans,“ segir í skriflegu svari Rúnars Pálmasonar upplýsingafulltrúa Landsbankans við fyrirspurn fréttastofu. 

Málningin var hreinsuð af og nýtt skilti sett upp í júlí. Rúnar vekur athygli á að merkið hafi verið málað á með umhverfisvænni málningu og því auðvelt mál að hreinsa hana af. 

Landsbankinn færði stóran hluta starfsemi sinnar í nýtt húsnæði við Reykjastræti 6 haustið 2023. Húsið er 16.500 fermetrar en í því starfar utanríkisráðuneytið einnig. 

Byggingin er áberandi hluti af miðborginni og einkennandi stuðlaberg prýðir veggi hennar. Það vakti athygli og jafnvel gagnrýni þegar Landsbankamerkið var málað á bert stuðlabergið um það leyti sem starfsemi hófst í bankanum.