Lengri heim­ferð bíður KR-inga og Egill kallar eftir Akra­borginni

Vegagerðin greindi frá fyrirhuguðum framkvæmdum og verður göngunum lokað klukkan átta annað kvöld, á meðan leik KR og ÍA stendur yfir.

„Mánudags- og þriðjudagskvöldin 14. og 15. júlí, frá kl. 20:00 til kl. 07:00, mun fara fram vegavinna í og við Hvalfjarðargöng. Göngin verða lokuð í báðar áttir auk hringtorgsins að norðanverðu. Hjáleið verður um Hvalfjörð,“ segir í yfirlýsingu Vegagerðarinnar.

Fótboltaþjálfarinn og KR-ingurinn Sigurður Helgason vakti athygli á málinu í stuðningsmannahópi KR á samfélagsmiðlinum Facebook. Fjölmiðlamaðurinn Egill Helgason kallar eftir því að Akraborgin flytji menn til og frá Skaganum annað kvöld. „Ræsa Bogguna?“ ritar hann við færslu Sigurðar.

Akraborgin var helsta flutningsleið fólks yfir Faxaflóa á árunum 1956 til 1998 en vék þegar Hvalfjarðargöng voru opnuð fyrir aldamótin.

Stuðningsmenn KR stefna á rútuferð á Skagann frá Rauða ljóninu síðari partinn á morgun en ljóst er að þeir koma öllu seinna í bæinn en áætlað var, þar sem rútan þarf að keyra Hvalfjörðinn á bakaleiðinni. Þannig má gera ráð fyrir að heimferðin taki nær 90 mínútum í stað 45 mínútna eða svo.

Sú seinkun mun þá eðli málsins samkvæmt einnig hafa áhrif á heimferð leikmanna KR, sem og starfsmanna Sýnar Sport sem munu starfa í kringum leikinn.

Sýn Sport mun sýna leikinn annað kvöld. Leikurinn er klukkan 19:15 og bein útsending hefst klukkan 19:00 frá Akranesi. Subway Tilþrifin verða í kjölfarið sýnd beint frá Skaganum til að gera upp leiki umferðarinnar.