Börnin læra að sauma út, baka og elda í Hús­stjórnar­skólanum

Fréttastofa kíkti við í Hússtjórnarskólann við Sólvallagötu þar sem ungir krakkar eru á námskeiði þar sem þau læra meðal annars að sauma út, baka og elda. Hugmynd að námskeiðum barna í skólanum vaknaði árið 2023 og fóru fyrstu námskeiðin fram ári seinna. Námskeiðin eru fyrir börn á öllum aldri og segir umsjónarmaður að áhuginn sé mikill.

„Við leggjum aðaláherslu á matreiðsluna og handavinnu og það er mismunandi handavinna eftir aldri. Við reynum að miða þetta að því sem er áhugi fyrir,“ segir Kristín Lára Torfadóttir, 

Hún segir mikilvægt að halda gildum Hússtjórnarskólans á lofti.

„Mér finnst það algjörlega og ég elska að vinna hérna. Það er alltaf æðisleg stemning og börnunum finnst gaman og mér finnst þetta góð gildi sem vert er að kenna,“ segir Kristín.

„Allt gaman“

Þegar fréttastofa kíkti í heimsókn voru nemendur úr yngsta hópi í óðaönn að sauma. Fyrr um morguninn höfðu þau verið í eldhúsinu.

„Við erum búin að læra til dæmis að sauma, elda og taka til,“ segir Sólveig.

Hvað finnst þér skemmtilegast af þessu öllu? 

„Mér finnst bara allt, mér finnst bara allt gaman,“ segir Katrín.

Strákarnir voru ekki síður áhugasamir og munaði ekki um að segja frá matreiðslunni á sama tíma og þeir saumuðu.

„Stundum þá er einhver matur eins og í dag þá vorum við að gera kjötbollur og skinkuhorn. Okkar hópur var að gera kjötbollur og hinn hópurinn var að gera skinkuhorn,“ segir Kári Berg.

Eruð þið svolítið góðir bakarar? 

„Já, við erum alveg dálítið góðir,“ segja Kári Berg og Birnir Blær í kór.

Fréttamaður fékk svo kennslustund í saumaskap en stelpurnar voru ekki alveg sannfærðar um hæfileikana og fannst hann heldur hægur.

„Svo telur þú bara hérna, einn tveir og stingur bara þar ofan í. Þá ertu komin með kross.“