Bæjarráð Voga vill gera ráð fyrir flugvelli í Hvassahrauni

Kristján Már Unnarsson skrifar 8. júlí 2025 11:22

Teikning af innanlandsflugvelli í Hvassahrauni.

Bæjarráð Sveitarfélagsins Voga vill að við gerð svæðisskipulags Suðurnesja fyrir tímabilið 2024 til 2040 verði tekið jákvætt í tillögu starfshóps innviðaráðuneytis um að svæði í Hvassahrauni verði tekið frá undir framtíðarflugvallarstæði. Þetta var samþykkt á fundi bæjarráðs síðastliðinn miðvikudag.

Svandís Svavarsdóttir, þáverandi innviðaráðherra, og Einar Þorsteinsson, þáverandi borgarstjóri, kynntu niðurstöðu starfshópsins þann 1. október síðastliðinn. Þar kom fram að starfshópurinn teldi að svæðið hentaði veðurfarslega undir flugvöll og að hætta vegna hraunflæðis væri afar lítil. Hölluðust Svandís og Einar bæði að því að haldið yrði áfram að undirbúa flugvöll í Hvassahrauni.

Frá kynningu á niðurstöðu starfshóps um Hvassahraunsflugvöll síðastliðið haust. Frá vinstri eru Eyjólfur Árni Rafnsson, formaður starfshópsins, Einar Þorsteinsson, þáverandi borgarstjóri, Svandís Svavarsdóttir, þáverandi innviðaráðherra, og til hægri er Daði Baldur Ottósson, verkefnisstjóri starfshóps um almenningssamgöngur.Vilhelm Gunnarsson

Eftir að þessi niðurstaða var kynnt gerðist það í síðustu eldsumbrotum á Sundhnúksgígaröðinni í byrjun aprílmánaðar að kvikugangur var að mati sérfræðinga Veðurstofunnar talinn hafa náð langleiðina að Kúagerði og fyrirhuguðu flugvallarstæði í Hvassahrauni. Kvikugangurinn braut sér á endanum leið til yfirborðs mun sunnar á gossprungunni með litlu eldgosi í útjaðri Grindavíkur en fjallað var um þessa ógn í þessari frétt:

Í drögum að nýju svæðisskipulagi fyrir Suðurnes er ekki tekin afstaða til Hvassahraunsflugvallar en vísað til þeirrar tillögu starfshóps innviðaráðuneytisins frá því síðastliðið haust að svæðið verði tekið frá undir flugvöll.

„Svæðisskipulagsnefnd hefur ekki mótað sér afstöðu til slíkrar landnotkunar. Í kynningu þessarar vinnslutillögu er sérstaklega óskað eftir athugasemdum við þá landnotkun eins og hún er kynnt og rökstudd í skýrslunni. Þær hugmyndir eru ekki reifaðar frekar hér heldur vísar nefndin í skýrslu starfshóps innviðaráðuneytisins,“ segir í greinargerð svæðisskipulagsnefndar.

Kvikugangurinn sem myndaðist í byrjun aprílmánaðar náði langleiðina að fyrirhuguðu flugvallarstæði í Hvassahrauni, miðað við þá mynd sem teiknaðist upp af skjálftavirkninni.Grafík/Sara Rut Fannarsdóttir

Sveitarfélagið Vogar kom á framfæri ábendingu við svæðisskipulag Suðurnesja þar sem segir:

„Er vert að benda á að niðurstöður starfshóps um byggingu flugvallar í Hvassahrauni eru þær helstar að ólíklegt sé að náttúruvá hafi áhrif á flugvöll á svæðinu, engin veðurskilyrði mæli gegn valinu og líklega verði ekki mikil langtímaáhrif á eftirspurn í innanlandsflugi ef af flutningi þess verður í Hvassahraun.

Það er lagt til að tekið verði jákvætt í uppbyggingu flugvallar í Hvassahrauni sem myndi þjóna kennslu-, æfinga- og einkaflugi, innanlandsflugi og sem varaflugvöllur millilandaflugs. Það yrði mikill akkur fyrir svæðið ef starfsemin hér að framan yrði flutt frá Reykjavík.“

Ráðamenn Icelandair létu á sínum tíma skoða hvernig sameinaður innanlands- og millilandaflugvöllur gæti litið út í Hvassahrauni. Þeir hafa síðan fallið frá stuðningi við Hvassahraunsflugvöll og sagðist forstjóri Icelandair í fyrra afskrifa flugvöll þar.Mynd/Goldberg Partners International.

Bæjarráð Voga fylgir svo ábendingunni eftir með svohljóðandi samþykkt í síðustu viku um tillögu að svæðisskipulagi Suðurnesja:

„Bæjarráð samþykkir tillöguna samhljóða en bendir á að í skipulagsáætlunum sveitarfélagsins er gert ráð fyrir flugvelli í Hvassahrauni og er það vilji sveitarfélagsins að tekið verði jákvætt í það.“

Vogar Skipulag Fréttir af flugi Keflavíkurflugvöllur Reykjavíkurflugvöllur Eldgos á Reykjanesskaga Eldgos og jarðhræringar Samgöngur

Tengdar fréttir

Mest lesið

Fleiri fréttir