Um­sókn Mið­flokksins í klúbb evrópska íhalds­manna ekki svarað

Heimildin fullyrti í umfangsmikilli umfjöllun sinni um alþjóðlegar tengingar Miðflokksins á dögunum að flokkurinn væri í aðildarferli hjá Íhalds- og umbótaflokki Evrópu (ECR), þingflokki hægriflokka á Evrópuþinginu. Hvorki flokkurinn né samtökin staðfestu það þó við blaðið.

Gunnar Bragi Sveinsson, framkvæmdastjóri Miðflokksins, staðfestir að flokkurinn hafi sóst eftir aðild að alþjóðlegu hliðarneti ECR í fyrra. 

„Ísland býr svo vel að eiga ekki fulltrúa á Evrópuþingi og eins og gefur að skilja getur íslenskur stjórnmálaflokkur því ekki verið formlegur hluti af slíku flokkasamstarfi,“ segir Gunnar Bragi í skriflegu svari við fyrirspurn Vísis.

Ekki hafi þó orðið af þessari aukaaðild þar sem stjórn ECR hafi ekki afgreitt umsóknina.

„Hvort það er vegna andstöðu okkar við ESB vitum við ekki,“ segir Gunnar Bragi í svari sínu.

Sannir Finnar og Svíþjóðardemókratar fyrir á fleti

Svíþjóðardemókratar í Svíþjóð og Sannir Finnar í Finnlandi eiga meðal annars aðild að ECR á Evrópuþinginu. Þá er Bræðralag Ítalíu, flokkur Giorgiu Meloni, forsætisráðherra Ítalíu, og Lög og réttlæti, fyrrverandi stjórnarflokkur Póllands, þar innan borðs.

Sjálfstæðisflokkurinn átti aðild að ECR þar til fyrir nokkrum árum. Hann er nú aðild að Evrópska lýðflokknum sem kristilegir demókrataflokkar eru áberandi í.

Adam Bielan, Evrópuþingmaður Laga og réttlætis, sagði Ríkisútvarpinu á þriðjudag að ECR ætti í góðum tengslum við Miðflokkinn enda deildi hann í meginatriðum sömu skoðunum.