Sviptur prófinu eftir að hafa ekið á 185

Í tilkynningu Lögreglunnar á höfuðborgarsvæðinu segir að tæplega fjörutíu ökumenn hafi verið teknir fyrir hraðakstur á höfuðborgarsvæðinu um helgina. 

Grófasta brotið hafi verið framið á Reykjanesbraut í Hafnarfirði, við Hvassahraun, en þar hafi bifreið mælst á 185 kílómetra hraða. Ökumaðurinn, karlmaður á fertugsaldri, hafi verið sviptur ökuréttindum til bráðabirgða, en hann eigi yfir höfði sér ákæru fyrir ofsaaksturinn. 

Fimm til viðbótar hafi verið sviptir ökuréttindum til bráðabirgða vegna hraðaksturs annars staðar í umdæminu, en ökumennirnir sem komu við sögu lögreglunnar í hraðakstursmálum helgarinnar séu á öllum aldri. Sá yngsti sé sautján ára og nýkominn með bílpróf en sá elsti á áttræðisaldri. 

Að venju hafi einnig margir verið teknir fyrir ölvunar- og/eða fíkniefnaakstur um helgina, eða tuttugu og fimm.