Tönnin slegin úr henni og var svo bannað að koma aftur inn á völlinn

Hin ástralska Melbourne leikur með Washington Mystics og var þarna að spila á móti Las Vegas Aces á útivelli.

Hún fékk óviljandi olnbogaskot í andlitið í leiknum með þeim afleiðingum að hún missti úr sér eina framtönnina sem brotnaði illa.

Melbourne þurfti að sjálfsögðu smá aðstoð til að stöðva blæðinguna og ná áttum. Það var hins vegar dæmd villa fyrir olnbogaskotið og Melbourne átti að taka víti.

Hún gat auðvitað það ekki, enda alblóðug í andlitinu og því varð Washington Mystics að senda annan leikmann á vítalínuna. 

Það þýddi um leið að Melbourne mátti ekki koma aftur inn í leikinn en reglurnar eru þannig í WNBA og NBA ólíkar því sem þær eru hjá FIBA.

Melbourne sást síðan seinna í leiknum sitjandi á bekknum að hvetja sitt lið. Hún brosti í gegnum tárin en fyrst á dagskrá þegar hún kom heim til Washington hlýtur að vera að hitta góðan tannlækni.