Vildi fleiri mínútur og stærra hlut­verk

Bragi er 21 árs gamall bakvörður, uppalinn í Grindavík en hefur einnig leikið með Haukum hér á landi. Hann spilaði svo með Penn háskólanum í Bandaríkjunum en ákvað að taka sér frí frá námsbókunum eftir áramót og kláraði tímabilið með Grindavík, sem datt út í oddaleik í undanúrslitum gegn Íslandsmeisturum Stjörnunnar.

Bragi lék 16 leiki með Grindavík á síðasta tímabili. Hann skoraði í þeim 5,1 stig að meðaltali í leik. En hjá Ármanni gæti hann fengið fleiri mínútur.

„Ég ætlaði að fara í Ármann og fá stærra hlutverk og þroskast aðeins sem leikmaður og fá vonandi fleiri mínútur. Ég talaði við Jóa [Jóhann Þór Ólafsson, þjálfara Grindavíkur] eftir tímabilið og sagði að ég væri ekki alveg að fá það hlutverk sem ég vildi. Ég fæ vonandi að sanna mig í ás, tvist og þrist hjá Ármanni,“ segir Bragi í Sportpakkanum á Sýn í gær.

„Auðvitað var þetta erfitt að fara frá Grindavík en ég gerði bara það sem er best fyrir mig.“

Bæði karlalið Ármanns og kvennalið félagsins komust upp á síðasta tímabili.

„Það er geggjað hjá þeim að koma báðum liðum upp og það er stórt tækifæri fyrir þau að vera komin aftur í efstu deild. Þarna eru flottir þjálfarar og góð stjórn. Ég er mjög spenntur að spila fyrir félagið.“