Skúringatæki pikkfast utan á eina segulómtækinu á Hring­braut

Samkvæmt upplýsingum frá Landspítalanum er nú unnið að því að losa tækið utan af vélinni og koma henni aftur í gagnið en staðgengill upplýsingafulltrúa Landspítalans gat ekkert sagt um hvernig það verði gert eða hvenær hægt verði að nota vélina.

Landspítalinn hefur þrjú segulómtæki til afnota. Tvö eru á Landspítalanum Fossvogi og eitt á Hringbraut. Þannig er eina segulómtækið á Landspítalanum við Hringbraut ónothæft um óákveðinn tíma.

Landspítalinn segir að þangað til að hægt verði að koma tækinu aftur í gagnið verði segulómskoðunum sem ekki eru nauðsynlegar frestað og þeim fundinn nýr tími. Þeir sem þurfa nauðsynlega að komast í segulómskoðun fá forgang.

Samkvæmt upplýsingum frá Landspítalanum hefur slíkt aldrei gerst áður í sögu spítalans.