Viðar Símonar­son látinn

Viðar lést á Landspítalanum í Fossvogi 2. júní síðastliðinn, áttræður að aldri, og verður jarðsunginn frá Hafnarfjarðarkirkju miðvikudaginn 18. júní.

Viðar, sem starfaði einnig sem íþróttakennari, var um árabil burðarás í sigursælu liði FH og íslenska landsliðsins. Hann var til að mynda valinn handknattleiksmaður ársins árið 1974.

Eitt eftirminnilegasta mark Viðars var jöfnunarmarkið gegn þáverandi heimsmeisturum Rúmeníu, í 14-14 jafntefli í Laugardalshöll árið 1971. 

Ári síðar lék hann með landsliðinu á Ólympíuleikunum í München, þegar handboltalandsliðið var í fyrsta sinn með á leikunum og hafnaði í 12. sæti.

Viðar stýrði svo íslenska landsliðinu á árunum 1975-76 og eftir að leikmannaferlinum lauk tók þjálfaraferillinn við. Þar afrekaði Viðar til að mynda nokkuð sem svo lengi var einsdæmi, að ná að gera bæði karla- og kvennalið að bikarmeisturum. Viðar gerði fyrst karlalið Hauka að bikarmeisturum 1980 og Stjörnukonur unnu síðan bikarinn undir hans stjórn níu árum síðar. Í bæði skiptin var um fyrsta bikarmeistaratitil félaganna að ræða.