Fékk sér Stöð 2 húð­flúr í beinni út­sendingu

Ráðstefnan er haldin í átjánda skipti um helgina en hún var fyrst haldin árið 2006.

„Ég er hér í óðaönn að fá mér merki stöðvarinnar sem brauðfæðir mig og börnin mín, sem ég á reyndar ekki,“ sagði Oddur Ævar, í beinni útsendingu í kvöldfréttum Stöðvar 2.

Össur Hafþórsson, eigandi Reykjavík Ink, er einn af forsprökkum hátíðarinnar.

„Þetta er rosaleg upplifun. Við erum hér með þrjátíu flúrara hvaðan er úr heiminum og með alla stíla og allar stefnur. Það er búið að vera gott flæði hér af fólkinu,“ segir Össur.

Hann hvetur fólk til að kíkja við í Gamla Bíó, bæði til að fylgjast með en einnig til að næla sér í húðflúr. Hann telur þó ekki upp húðflúr Odds aðspurður hvert sé klikkaðasta húðflúr sem hann hefur séð.

„Klikkaðasta tattúið sem ég hef séð er þegar þýskur ferðamaður kom inn og vildi fá, og fékk sér, merki þess hvernig maður á að þvo sér í sundlaugunum. Það var það fáránlegasta sem ég hef nokkurn tímann séð á ævinni fyrr eða síðar og ég held að við gerum það aldrei aftur,“ segir Össur.

Oddur er hins vegar ekki sá fyrsti sem fær sér húðflúr í beinni útsendingu í sjónvarpi. Jóhann K. Jóhannsson fréttamaður heimsótti hátíðina árið 2017 og fékk sér húðflúr líkt og sést hér.

Fréttamaðurinn Vésteinn Örn Pétursson fékk sér einnig flúr í beinni árið 2023, eftir að hafa fengið leyfi frá foreldrum sínum.

Hallgerður Kolbrún E. Jónsdóttir fréttamaður sótti ráðstefnuna í fyrra og fékk sér blævæng í beinni.