Líftæknifélagið Alvotech tilkynnti rétt eftir lokun markaða um klukkan hálf fjögur í gær að félagið hefði ákveðið að efna til hlutafjárútboðs á um 7,5 milljónum sænskra heimildarskírteina (SDR) og hlutabréfa í félaginu í því skyni að breikka og styrkja hluthafahópinn. Útboðinu var beint að íslenskum, sænskum og alþjóðlegum stofnanafjárfestum og fór fram á grundvelli tilboðsfyrirkomulags.
Umsjónaraðilar útboðsins voru DNB Carnegie og Citi en auk þeirra sáu Skandinaviska Enskildabanken (SEB) og ACRO verðbréf um að safna í tilboðsbækur.
Íslenskir fjárfestar stóðu aðeins undir um tíu prósent af stærð útboðsins en einn erlendur sjóður vildi taka bréfin í gegnum íslenska markaðinn.
Búið var að fylla pantanabókina innan við klukkutíma eftir að útboðið hófst, samkvæmt upplýsingum sem birtust í viðskiptamannakerfi Bloomberg síðla dags í gær, en síðar átti hún eftir að stækka nokkuð. Að lokum var ákvarðað, bæði á grundvelli eftirspurnar og til að tryggja sem bestu samsetningu fjárfestahópsins, að áskriftarverðið yrði 100 sænskar krónur á hlut, eða sem jafngilti um níu prósenta fráviki frá dagslokagengi á sænska markaðinum í gær.
Heildarstærð útboðsins var því 750 milljónir sænskra króna, jafnvirði nærri tíu milljarðar íslenskra króna. Sú fjárhæð nemur um tveimur prósentum af markaðsvirði félagsins sem var um 460 milljarðar áður en útboðið hófst.
Seld voru ríflega 5,83 milljón sænsk heimildarskírteini og jafnframt um 1,666 milljón hlutir að nafnvirði á markaðinn hér heima á genginu 1.320,83 krónur, eða sem nemur um 2,2 milljörðum að markaðsvirði. Erlendir fjárfestar stóðu hins vegar undir stórum hluta þeirra bréfa sem voru seld á íslenska markaðinn í útboðinu.
Hlutabréfaverð Alvotech í Kauphöllinni stendur núna í 1.340 krónum á hlut og er niður um tæplega sjö prósent miðað við dagslokagengið í gær. Gengi bréfa félagsins á markaði í Svíþjóð er 101 sænsk króna á hlut en veltan þar hefur verið óvenjulega mikil sem af er degi, eða sem nemur jafnvirði um 300 milljónum íslenskra króna.
Íslendingar með einn tíunda af stærð útboðsins
Róbert Wessman, forstjóri og stjórnarformaður Alvotech, segir í samtali við Innherja að með útboðinu séu að bætast við um fjörutíu nýir erlendir fjárfestar í hluthafahópinn. Helmingurinn af þeim séu alþjóðlegir sjóðir, en um 40 prósent sænskir og norskir fjárfestingarsjóðir. „Íslenskir fjárfestar stóðu aðeins undir um tíu prósent af stærð útboðsins en einn erlendur sjóður vildi taka bréfin í gegnum íslenska markaðinn,“ útskýrir Róbert.
Þá upplýsir hann um að umframeftirspurnin hafi verið ríflega sextíu prósent og heildarstærð pantanabókarinnar því yfir 1.200 milljónir sænskra króna.
„Við þurftum því að skera niður pantanir hjá fjárfestum fyrir jafnvirði um 500 milljónir sænskra króna. Markmiðið með útboðinu var enda einungis að fá inn erlenda fjárfesta að félaginu, ekki að fá sem mestan pening. Öll umframeftirspurn var því skorin niður í því skyni að reyna tryggja öflugan eftirmarkað með bréf í félaginu til lengri tíma,“ að sögn Róberts.
Hann nefnir einnig að áður en farið var af stað með útboðsferlið hafi komið til greina að einskorða það aðeins við fjárfesta utan Íslands. Það hafi hins vegar verið vilji til þess meðal sumra erlendra fjárfesta, og eins áhugi hér heima, að fá sömuleiðis að hluta inn íslenska fjárfesta að útboðinu.
Á meðan erlendir sjóðir lögðu félaginu því til samanlagt jafnvirði um níu milljarða króna að því fjármagni sem Alvotech sótti sér útboðinu var hlutdeild íslenskra fjárfesta um einn milljarður. Þar var einkum um að ræða lífeyrissjóði sem eru fyrir í hluthafahópi félagsins.
Norski olíusjóðurinn meðal fjárfesta
„Ég er alveg í skýjunum með þessa niðurstöðu. Feykilega ánægður og stoltur,“ undirstrikar Róbert, og vísar til fjölda þeirra sjóða sem koma nýir inn í hluthafahópinn og þá umframeftirspurn sem var í útboðinu. „Sérstaklega með hliðsjón af því að markaðsumhverfið er ekki eins og best verður á kosið um þessar mundir.“
Öll umframeftirspurn var skorin niður í því skyni að reyna tryggja öflugan eftirmarkað með bréf í félaginu til lengri tíma.
Forstjóri Alvotech bætir við að allt ferlið – alveg frá því að félagið tilkynnti um kaup á allri þróunarstarfsemi Xbrane Biopharma í marsmánuði og boðaði í framhaldinu skráningu á markað í Svíþjóð – hefði gengið „alveg ævintýralega vel“. Í aðdraganda þess að félagið fór á markað í Stokkhólmi upp úr miðjum síðasta mánuði áttu stjórnendur og ráðgjafar Alvotech nokkra fundi (e. non-deal roadshow) með fjárfestum, meðal annars lífeyrissjóðum og stærri fjárfestingasjóðum- og félögum, í Bretlandi og Skandinavíu.
„Við fundum þar fyrir miklum áhuga, en vissum auðvitað ekkert hvernig ætti eftir að spilast út úr því fyrr en á að það myndi reyna,“ segir Róbert.
Samkvæmt heimildum Innherja stóðu tíu umsvifamestu erlendu sjóðirnir í útboðinu undir um sjötíu prósent þeirrar fjárhæðar sem Alvotech sótti sér. Ekki liggja fyrir upplýsingar um nöfn sjóðanna en þar er meðal annars um að ræða fjárfesta sem einblína á líftæknigeirann, tryggingafélög og lífeyrissjóði. Þá var Olíusjóður Noregs, stærsti fjárfestingarsjóður í ríkiseigu á heimsvísu, meðal þátttakenda í útboðinu. Hann hefur fjárfest talsvert í íslenskum ríkisskuldabréfum, ásamt einnig sértryggðum bréfum bankanna, en átti í lok síðasta árs enga eignarhluti í skráðum félögum hér á landi.
Áforma að fjölga starfsmönnum í Svíþjóð í tvö hundruð
Ráðist var í útboðið með það að markmiði að fjölga alþjóðlegum fjárfestum í hluthafahópnum, til að byggja ofan á nýlega skráningu á markað í Svíþjóð og auka veltu SDR heimildarskírteinanna, að því er sagði í tilkynningu frá Alvotech seint í gærkvöldi þegar niðurstaðan lá fyrir. Þá var einnig nefnt að félagið vildi vera enn betur í stakk búið til að grípa tækifæri sem gefast til stækkunar á rannsóknar- og þróunarhluta félagsins.
Andvirði af sölu bréfanna verður því varið til að styrkja enn frekar þróun á nýjum hliðstæðum, einkum í Svíþjóð þar sem Alvotech hefur nýlega fest kaup á rannsóknaraðstöðu sænska félagsins Xbrane. Með því hyggst félagið auka enn verðmæti lyfja í þróun og nýta önnur tækifæri til vaxtar.
Kaupin á Xbrane kláruðust formlega í liðnum mánuði. Með þeim tekur Alvotech yfir aðstöðu og búnað Xbrane við Karólínska sjúkrahúsið í Stokkhólmi og starfsfólk í þróunardeild fyrirtækisins sem telur um 40 manns tengt fyrirhugaðri hliðstæðu félagsins við Cimizia. Tekjur af sölu þess nema jafnvirði um 300 milljörðum íslenskra króna á ári og er áætlað að hliðstæða við það komið á markað 2028. Alvotech áformar að starfsmannafjöldinn í Svíþjóð verði um tvö hundruð talsins innan eins ár samhliða því að þróun á fleiri lyfjum færast þangað.
