Rigning í dag og svo von á júníhreti

Á morgun, mánudag gengur í norðan stinningskalda. Í hugleiðingum veðurfræðings segir að búast megi við rigningu eða slyddu með köflum á norðanverðu landinu og snjókoma á heiðum og til fjalla. Úrkoman verður mestmegnis á formi rigningar austanlands fram á kvöld, en síðan gæti hún orðið slyddukennd þar. Suðvestantil verður væntanlega engin úrkoma. Það kólnar í veðri og annað kvöld er hita spáð frá frostmarki í innsveitum fyrir norðan, upp í sjö stig við suðurströndina.

Samkvæmt hugleiðingum hvessir svo enn frekar á þriðjudag og er þá útlit fyrir allhvassa eða hvassa norðanátt og jafnvel storm á stöku stað í vindstrengjum á suðurhelmingi landsins. Búast má við talsverðri rigningu á láglendi norðan- og austanlands og slyddu eða snjókomu til fjalla. Úrkomuminna sunnan heiða. Hiti 2 til 10 stig, kaldast í innsveitum norðanlands.

Gular viðvaranir sem gæti fjölgað

„Það stefnir semsagt í júníhret fyrripart næstu viku og í gær var byrjað að senda út viðvaranir vegna þess. Líklegt er að í dag muni fjölga viðvörunum og þeim verði svæðaskipt, en slíkt er gert þegar styttra er í atburðinn og spár verða vissari,“ segir að lokum í hugleiðingum veðurfræðings.

Búið er að gefa út gula viðvörum vegna veðurs á morgun, þriðjudag og miðvikudag. Viðvörunin tekur fyrst gildi á Ströndum og Norðurlandi vestra klukkan 9 í fyrramálið og svo um hádegi á Norðulandi eystra og seinnipart á Austurlandi. Á miðnætti, aðfaranótt 3. Júní, verður svo gul viðvörun á landinu öllu í heilan sólarhring. Búast má snjókomu og norðan hríð Vestur- og Norðurlandi og krapa og hálku víða á vegum og erfiðum akstursskilyrðum.

Spáð er norðan hvassviðri eða storm, hvassast verður á vestanverðu landinu og sunnan undir Vatnajökli. Í veðurspá segir að huga þurfi að lausamunum og að aðstæður geti orðið varasaman fyrir ökutæki sem taki á sig mikinn vind. Einnig verður talsverð úrkoma norðaustan- og austantil, líklega snjókoma til fjalla sem valdið getur afmörkuðum samgöngutruflunum.

Veðurhorfur á landinu næstu daga

Á mánudag:

Gengur í norðan 10-15 m/s. Rigning eða slydda með köflum á norðanverðu landinu og snjókoma til fjalla. Rigning austanlands, en þurrt að kalla suðvestantil á landinu. Kólnandi veður, hiti síðdegis frá frostmarki í innsveitum fyrir norðan, upp í 8 stig við suðurströndina.

Á þriðjudag:

Norðan 13-23 m/s, hvassast í vindstrengjum á suðurhelmingi landsins. Talsverð rigning á láglendi norðan- og austanlands og slydda eða snjókoma til fjalla. Úrkomuminna sunnan heiða. Hiti 2 til 10 stig, kaldast í innsveitum norðanlands.

Á miðvikudag:

Norðan 8-15 m/s og rigning, en þurrt að kalla á sunnanverðu landinu. Hiti breytist lítið.

Á fimmtudag:

Minnkandi norðanátt. Dálítil rigning eða slydda á Norður- og Austurlandi, en bjartviðri sunnan heiða. Hiti 2 til 12 stig, hlýjast sunnanlands.

Á föstudag og laugardag:

Norðlæg eða breytileg átt. Dálítil rigning norðantil, en skúrir á sunnanverðu landinu. Áfram kalt í veðri.