Kolli stígur aftur inn í hringinn: „Getur enginn verið ó­sigraður að ei­lífu“

Kol­beinn mætir Þjóðverjanum ósigraða, Mike Lehnis í hnefa­leika­hringnum í Nurn­berg á laugar­daginn kemur og undir er GBU heims­meistara­titillinn en fyrir er Kol­beinn Baltic Union meistari.

„Ég er búinn að æfa rosa vel, er í rauninni búinn að vera æfa í fjóra mánuði fyrir þetta þannig að ég er bara til í þetta,“ segir Kol­beinn.

Er þetta hættu­legur and­stæðingur?

„Já hann er mjög sprækur, sterkur og er örv­hentur sem er viss áskorun fyrir mig. Ég þurfti að aðlaga allt hjá mér miðað við þá stöðu. Fá örv­henta æfingafélaga og æfa allt öðru­vísi. Það er öðru­vísi að berjast við örv­henta.

Ef þeir eru rétt­hentir er svona nokkurn veginn sama hvernig þú berst nema að þeir séu með ein­hvern sér stíl. Örv­hentir boxarar er bara allt annað dæmi. Það er allt speglað og þú þarft að berjast við þá á vissan hátt. Við þurftum að breyta öllu, breyttum því um leið og við fengum að vita að þessi bar­dagi myndi fara fram.“

Öflugir örv­hentir æfingafélagar hafa komið hingað til lands til þess að hjálpa Kol­beini í undir­búningi hans.

„Hann fór heim á laugar­daginn síðasta, Finni sem er at­vinnu­maður og hefur unnið 21 bar­daga, tapað þremur. Hann er örv­hentur og var að æfa með mér í þrjár vikur, svo eru báðir þjálfararnir mínir örv­hentir og það er mér því ekki í óhag að berjast við örv­hentan boxara.“

Nokkrir bardagar í boði

Kol­beinn hefur verið á miklu skriði og verður þetta fjórði bar­daginn hans á innan við ári.

„Ég held að ég hafi síðast náð fjórum bar­dögum á einu ári fyrst þegar að ég var að byrja. Það eru mörg ár síðan að ég náði svona bar­dögum á einu ári.

Við vorum með nokkra bar­daga í boði en sumir þeirra hefðu komið aðeins of snemma eða aðeins of seint. Þetta var and­stæðingur sem við vorum búnir að horfa á og tíma­setningin hentaði nokkuð vel. Við kýldum því bara á þetta.“

Getur enginn verið ósigraður að eilífu

Kol­beinn er á sau­tján bar­daga sigur­göngu, einn af hundrað bestu þunga­vigtar boxurum á heims­vísu og er líkt og and­stæðingurinn á laugar­daginn enn ósigraður á sínum at­vinnu­manna­ferli.

Að­spurður hvort það verði meira íþyngjandi að hafa ekki tapað bar­daga eftir því sem líður á ferilinn segist Kol­beinn ekki hugsa út í það.

„Það getur enginn verið ósigraður að eilífu. Maður telur á einni hönd boxara sem hafa farið í gegnum ferilinn án þess að tapa. Ef það kemur þá kemur það bara en maður verður bara að halda áfram.“

Hvernig sérðu fyrir þér að bar­daginn fari?

„Ég sé fyrir mér að ég roti hann. Örugg­lega snemma.“