Brauðtertu- og ostakökukeppni á Sel­fossi

Átta manna dómnefnd sá um að smakka og meta kökurnar í keppninni, sem fór fram í gær í miðbænum á Selfossi. Kökunum var síðan raðað á borð úti þar sem gestir og gangandi gátu skoðað þær og metið.

„Hér hafa keppendur lagt allt undir til að verða annað hvort besta ostakakan eða besta brauðtertan,“ segir Ragnar Freyr Ingvarsson, matgæðingur og formaður dómnefndar.

Það hlýtur að vera gaman að taka þátt í svona verkefni?

„Já, ég hef svo sannarlega unnið leiðinlegri störf en þetta, það get ég sagt þér. Þetta er líklega eitt ljúffengasta verkefni, sem ég hef tekið að mér,“ segir Ragnar Freyr.

Og Þá var komið að Silju Hrund Einarsdóttur frá Konungs Kaffi að tilkynna sigurvegarana.

„Sigurvegarinn í brauðtertukeppninni fyrir Konungs Kaffi og Kaffi Krús 2025 er Steinunn Erla Sigurgeirsdóttir, sem er með skonsutertu með hangikjötssalati.“

Og svo var komið að því að tilkynna sigurvegarann í ostaköku keppninni.

„Sigurvegarinn í þeim hluta er Jónína Guðný Jóhannsdóttir með kökur, sem hún kallar Sumarsælu,“ sagði Silja Hrund.

Dómnefndin var einróma sammála um að frumlegasta kaka keppninnar væri kakan hennar Önnu Höllu Hallsdóttir en það er Rabarbara- og engifer ostakaka.

Allar verðlaunakökurnar fara í sölu i Konungs Kaffi og Kaffi Krús í sumar. Vinningshafarnir eru að vonum ánægðir með það.

„Það er mjög skemmtilegt, virkilega skemmtilegt. Þetta er mjög spennandi verkefni og við erum til í það,“ sögðu þær Anna Halla, Jónína Guðný og Steinunn Erla.