„Það þarf að fræða starfsmenn verslana á Íslandi um rýrnun og leiðir til að minnka hana, kenna þeim meðal annars hver munurinn er á þekktri og óþekktri rýrnun. Mikilvægt er að átta sig á því hvar rýrnun verður til til að geta spornað við henni. Ef við vitum hvar og hvernig þjófar eru að bera sig að þá getum við brugðist við með lausn. Ef við vitum hvað veldur þekktri rýrnun þá er hægt að bregðast við með bættum ferlum. Ef við höfum ekki þessar upplýsingar þá mun vandamálið bara stækka og stækka og valda fyrirtækjunum meira og meira tjóni,“ segir Pétur Magnússon, deildarstjóri vörustýringar og innkaupa hjá Öryggismiðstöðinni, í tilkynningu.

Pétur segir að besta forvörnin í verslunum séu vakandi starfsmenn og snyrtilegt umhverfi.

„Mikilvægt er að læra hratt af þjófnuðum og ráða yfir tólum til að stöðva rýrnun, t.d. þegar þjófagengi herja á verslanir þá verður að vera til viðbragð til að stöðva viðkomandi næst þegar þeir koma í verslunina.“

Fjölbreyttar tæknilausnir í boði

Hann segir fjölbreyttar tæknilausnir í boði til að bregðast við. Til dæmis sé hægt að vera með aðgangshlið við inn og útganga til að stýra flæði í verslunum og hægt að notast við gervigreind í myndavélum til að bregðast við einstaklingum sem fari út um innganga með kerrur fullar af vörum. Þá séu einnig í boði lausnir sem séu tengdar beint við birgðakerfi verslana.

„Margir fataframleiðendur merkja sínar vörur með RFID merkjum við framleiðslu. Með svona merkingum er hægt að lesa vörur sjálfkrafa inn við vörumóttökur, fylgjast með vörunum á lagernum og inni í verslun. Til dæmis fyrir sítalningar og til að nota merkið til að lesa vöruna inn á afgreiðslukassanum og sem þjófavörn ef reynt er að fara með vöruna út án þess að greiða fyrir hana.“

Hægt að nota lausnir á skilvirkari máta

Pétur segir fyrirtæki oftast með nokkrar tæknilausnir í notkun en að oft sé hægt að nýta þær á skilvirkari máta.

„Þannig má til dæmis tengja myndavélar við þjófavarnarbúnað og öryggiskerfi til að kalla fram betri upplýsingar við atburð, ekki bara að láta einhvern hljóðgjafa fara í gang. Þannig má hugsa sér að þegar þjófavarnarhlið fara í útkall þá fari strax myndefni af viðkomandi atburð á öryggisvörð verslunarinnar eða annan ábyrgan aðila sem getur brugðist við,“ segir Pétur og heldur áfram:

„Svona tengingar milli kerfa geta flýtt viðbragði mikið og létt úrvinnslu. Gervigreindarlausnir í myndavélum eru í mikilli þróun og um að gera fyrir fyrirtæki að fylgjast mjög vel með lausnum þar sem geta létt þeim lífið og aukið skilvirkni. Í dag má hugsa sér að nota slíkar lausnir við t.d. að fylgjast með einstaklingum sem fara út um innganga verslana, einstaklingum sem eru við dyr verslana í ákveðið langan tíma að næturlagi, fá tilkynningar um grunsamlega hegðun í verslunum.“