Því já; Svo hröð verður tækniþróunin framundan að einfaldlega ekkert fyrirtæki mun fara varhluta af því.
Að huga ekki að því hvernig nýsköpun verður hluti af vinnustaðamenningunni þýðir einfaldlega að fyrirtæki eru líkleg til að tapa samkeppnishæfni sinni.
Ekki síst nú þegar gervigreindin er þegar að boða stórar breytingar.”
Í gær og í dag fjallar Atvinnulífið um mikilvægi þess að fyrirtæki efli sig í nýsköpun.
Breyttir tímar
Davor starfar hjá Króatíska fyrirtækinu Resonate Digital, sem nú þegar hefur haslað sér völl á Íslandi og Atvinnulífið sagði meðal annars frá fyrir nokkrum árum síðan. Það viðtal má sjá hér að neðan.
Í gær stóð Resonate Digital fyrir viðburði í Grósku, undir yfirskriftinni Enterprise Innovation en auk Davors voru með erindi Guðrún Aðalsteinsdóttir, framkvæmdastjóri Krónunnar, Þórir Ólafsson, forstöðumaður stafrænnar þróunar hjá Icelandair, Rósa Dögg Ægisdóttir, framkvæmdastjóri Reon, Paul Veaver VP Digital Design og Vilhjálmur Alvar Halldórsson, stjórnendaráðgjafi í stefnumótun og stafrænni umbreytingu.
Davor segist viljandi hafa opnað erindið sitt með glæru sem sýnir glöggt, hversu hratt breytingar geta orðið í atvinnnulífinu ef fyrirtæki eru ekki sífellt á tánum.
„Árið 1965 voru fyrirtæki sem töldust til þeirra 500 stærstu að meðaltali á S&P listanum í 33 ár. Í dag eru þau á listanum að meðaltali í 17 ár og ef þessi þróun heldur áfram má telja líklegt að fljótlega verði meðaltalið tíu ár. Það er þessi þróun sem gerir það að verkum að sérfræðingar eins og McKinsey spá því nú að innan tíu ára verði búið að skipta út um 40% af fyrirtækjunum sem við sjáum á listanum sem 500 stærstu fyrirtækin í dag.“
Sem er athyglisvert því þótt verið sé að tala um stærstu fyrirtækin í heimi, má vel ímynda sér að sambærilega þróun megi sjá á listum fyrir smærri samfélög. Til dæmis er oft vísað í listann yfir 300 stærstu fyrirtækin á Íslandi og hér gætum við því spurt: Munu 40% af fyrirtækjunum sem við sjáum á þeim lista nú, falla af listanum innan tíu ára?
„Þetta er í raun ástæðan fyrir því að við hjá Resonate Digital vildum standa fyrir þessum viðburði í Grósku og opna umræðuna.“
Hugarfarið og reynslan
Davor segir oft vera hægt að sjá einkenni þeirra fyrirtækja sem hugsa hlutina til framtíðar og með því hugarfari sem nýsköpun kallar á.
„Fyrirtæki sem vinna eingöngu að lausnum sem eiga að skila ávinningi strax eru þau fyrirtæki sem teljast „óþroskaðari“ í nýsköpunarviðhorfinu og þar af leiðandi líklegri til að hellast úr lestinni,“ segir Davor en bætir við:
„Fyrirtæki sem teljast „þroskaðari“ í þessum efnum eru hins vegar þau fyrirtæki sem er eðlislægt að hugsa hlutina út frá stærri mynd og alltaf út frá því hvað sé besta lausnin fyrir viðskiptavininn.“
Eflaust telja flest fyrirtæki sig flokkast undir þau síðarnefndu en Davor segir það alls ekki vera svo.
Því of oft er viðhorfið innan fyrirtækjanna þannig að stjórnendur og starfsfólk telur sig þekkja þarfirnar svo vel að þeim finnst þau vera fullfær um að ákveða sjálf hvernig standa eigi að frekari þróun eða umbótum.“
Á Íslandi starfar Resonate Digital meðal annars með fyrirtækjum eins og Festi, Elka, Abler, Yay!, Alda, Aurbjörg, Verna og fleiri. Allt fyrirtæki sem eru frekar framarlega þegar kemur að nýsköpun og tækniframförum.
Telur þú kynslóðamun skipta máli: Eru yngri stjórnendur til dæmis líklegri til að efla nýsköpunarhugarfarið en þeir eldri?
„Nei,“ svarar Davor að bragði.
„Mín reynsla er frekar sú að þar skipti reynslan meira máli en aldurinn. Því margir stjórnendur hafa starfað á nokkrum stöðum og búa því yfir ákveðinni víðsýni og reynslu sem nýtist vel þegar kemur að því að efla nýsköpun. Þessir stjórnendur hafa mögulega ákveðið forskot fram yfir stjórnendur sem hafa unnið sig upp í starfi en starfað lengi á sama vinnustað.“
Æðsti stjórnandinn leiðir
Devor segir samt heilt yfir margt vinna með íslenskum fyrirtækjum þegar kemur að nýsköpun. Hér sé mikil gróska í nýsköpun og mjög einkennandi viðhorf að startup fyrirtæki og sprotar veigra sér ekkert við að hugsa stórt.
„Hér ætla allir sem starfa í nýsköpun að sigra heiminn; Hugarfar sem strax eykur líkurnar á því að eitthvað geti fyrir alvöru gerst. Að sem flestir hugsi svona er af hinu góða þegar kemur að því að innleiða nýsköpun inn í fyrirtækjamenninguna þannig að það sé eðlilegur partur af starfseminni að hugsa í þróun og nýjum tækifærum.“
Davor talar um þetta sem „innovation cycle“ og segir að markmið viðburðarins í gær hafi meðal annars verið sá að heyra hvernig sumum fyrirtækjum er að takast nokkuð vel að byggja upp nýsköpunarmenningu með markvissri vinnu eða aðferðarfræði innanhús hjá sér.
„Ein ástæðan fyrir því að við vildum opna þetta samtal var að heyra frá fyrirtækjum sem eru að gera góða hluti í að innleiða nýsköpunarhugarfarið hjá sér.“
Það atriði sem Davor segir þó alltaf þurfa til þess að það sé hægt, er að æðstu stjórnendurnir þurfa að leiða verkefnið.
Mín reynsla er sú að það verður að koma frá æðstu stjórnendum að ætlunin sé að innleiða nýsköpun á markvissan hátt eða nýsköpunarmenningu inn í fyrirtæki.
Þetta er þannig umbreyting hjá fyrirtækjum að verkefnið fellur um sjálft sig ef það er ekki leitt áfram frá toppnum og niður.”
