Börn niður í átta mánaða fá inni á leik­skóla

„Við leggjum ríka áherslu á að þjónustan okkar sé sveigjanleg og í takt við þarfir fjölskyldna í bænum,“ er haft eftir Almari Guðmundssyni, bæjarstjóra Garðabæjar í fréttatilkynningu um innritunina.

Þar segir að hægt hafi verið að verða við fyrsta vali í flestum tilvikum og bjóða systkinum leikskólavist í sama skóla.

Úrvinnsla úr boðnum plássum standi enn yfir þar sem nokkrir foreldrar hafi ekki enn staðfest að þeir þiggi leikskólaplássið eða vilji flutning á milli skóla. Þeir séu hvattir til að ganga frá ákvörðun sinni sem allra fyrst. Að meðaltali bætist 20 til 25 börn við á biðlistann í hverjum mánuði og leikskólar Garðabæjar séu nú að mestu fullsettnir, en laus pláss séu enn á ungbarnaleikskólanum Mánahvoli, þar sem 55 börnum verði boðin dvöl til viðbótar.

Einnig standi til að nýta rými í Litlakoti við Krakkakot á Álftanesi og fjölga plássum í fimm ára deild Sjálandsskóla í haust.

Næsta innritunarlota verði í maí 2025 og þá verði innritað í laus pláss í Mánahvoli og einnig verði staðan skýrari í öðrum leikskólum. Reiknað sé með að börn fædd í ágúst og september 2024 fái boð um dvöl við þá úthlutun. Vert sé að minna á að innritun eigi sér stað allan ársins hring í leikskóla Garðabæjar, eftir því sem pláss losna.