Stoltir Ís­lendingar af þætti sínum í stærsta fraktflugfélagi Evrópu

Í fréttum Stöðvar 2 og í þættinum Flugþjóðin fórum við til Lúxemborgar þar sem einn angi íslenska flugævintýrisins gerðist. Þar tók að myndast íslensk flugnýlenda um miðjan sjötta áratuginn þegar Loftleiðir gerðu Findel-flugvöll að aðalstarfsstöð sinni á meginlandi Evrópu vegna Ameríkuflugsins.

Loftleiðamenn léku síðan lykilhlutverk í stofnun Cargolux árið 1970, fraktflugfélags sem í dag rekur þrjátíu þotur af gerðinni Boeing 747. Loftleiðir og síðar Flugleiðir áttu lengi vel þriðjungs hlut í félaginu.

„Það byrjar í raun sem verkefni frá Loftleiðum, spin-off verkefni þaðan. En hefur svo hlotið gríðarlegan stuðning frá Lúxemborg líka og með þeim stuðningi og fjármagni fengið tækifæri til að vaxa og dafna,“ segir Brynjar Örn Sveinjónsson, yfirflugstjóri Cargolux.

Enn í dag starfar fjöldi Íslendinga hjá Cargolux.

„Í dag eru það um 65 Íslendingar sem eru eftir,“ segir Móeiður Sigurðardóttir, oftast kölluð Móa, en hún er forstöðumaður samskipta- og sjálfbærnimála Cargolux.

Hún segir Íslendinga að finna í flestum deildum fyrirtækisins, svo sem á skrifstofum, í innkaupadeild, fraktdeild, í flugskýlinu og í fluginu. Margir Íslendinganna gegni stjórnunarstöðum.

„Þannig að þeir eru eiginlega allsstaðar.

Þetta eru eiginlega allt meira og minna Íslendingar sem búa hér. Og þetta er mikið önnur kynslóð Íslendinga, eins og ég. Sem hafa byrjað að vinna hjá fyrirtækinu eftir að mamma eða pabbi voru að vinna hérna, sérstaklega pabbarnir,“ segir Móa.

Og það er slatti íslenskra flugmanna að stýra júmbó-þotunum.

„Við erum í kringum tuttugu íslenskir flugmenn í dag. Voru svolítið fleiri hérna í kringum covid-tímabilið. En þeir hafa svona fljótlega farið að færa sig aftur yfir til Icelandair og þangað þar sem þeir voru fyrir,“ segir Brynjar.

Það er magnað að hugsa til þess að flugfélag sem er sannarlega afkvæmi Loftleiðaævintýrisins er í dag stærsta fraktflugfélag Evrópu og það fimmta stærsta í heimi.

Og Íslendingarnir sem tóku þátt í að byggja upp flugstarfsemina í Lúxemborg eru stoltir, eins og hjónin Björn Sverrisson og Salvör Þormóðsdóttir, sem bæði hófu störf hjá Loftleiðum og luku starfsferlinum hjá Cargolux.

-Finnið þið til þess að þetta er hluti af íslensku flugsögunni?

„Já, já. Við erum stundum hreykin af þessu, mjög hreykin,“ svarar Björn, sem var flugvirki og flugvélstjóri.

„Já, við erum partur af því líka. Þannig að maður er alveg hreykinn af því að hafa verið innvinklaður í þetta,“ svarar Salvör, sem var flugfreyja.

Hér má sjá frétt Stöðvar 2:

Þetta var fyrri þáttur af tveimur um íslensku flugnýlenduna í Lúxemborg. Seinni þátturinn verður sýndur að viku liðinni.

Í þætti Flugþjóðarinnar fyrir þremur vikum um flugútrás Íslendinga var lýst aðdragandanum að stofnun Cargolux þegar fjallað var um Atlantshafsflug Loftleiða og hjálparflugið í Biafra í þessu tíu mínútna myndskeiði:

Áskrifendur Stöðvar 2 og Stöðvar 2+ geta séð þættina um Flugþjóðina í streymisveitu Stöðvar 2 hvar og hvenær sem er. 

Hér er kynningarstikla þáttanna: