Katie endurnýjar kynnin við lið Þróttar Reykjavíkur á komandi tímabili. Hún spilaði fyrir liðið tímabilið 2021 sem og 2023 og eftir stutt stopp hjá Val á síðasta tímabili, þar sem að hún varð bikarmeistari, er hún nú mætt aftur í Laugardalinn eftir að ekki náðist samkomulag milli hennar og Vals um nýjan samning.
„Á endanum gekk það ekki upp. Ég átti ekki að vera þar á næsta tímabili og er mjög ánægð með að vera mætt aftur í Þrótt með mínum gömlu liðsfélögum en nýjan þjálfara sem ég ræddi aðeins við á síðasta ári og var dálítið svekkt með að geta ekki spilað undir á þeim tíma. Ég er mjög spennt fyrir því að spila undir stjórn Ólafs á komandi tímabili. Spennt fyrir því að vera komin aftur hingað.“
En af hverju gekk þetta ekki upp með Val. Snerist þetta um peninga eða eitthvað annað?
„Á endanum sáu þeir mig ekki sem hluta af sínum framtíðarplönum. Það er í lagi mín vegna enda þeirra að ákveða.“
Þannig að þetta þeirra ákvörðun?
„Já en eins og ég segi þá þurfti ég ekki að hugsa mig tvisvar um þegar að Þróttur kom að borðinu. Fólkið hér í kringum félag er frábært. Þegar að ég rakst á það á förnum vegi á síðasta ári lét það mig vita að hér ætti ég alltaf samastað.“
Eftir að hafa slegið í gegn hér á landi bjuggust kannski margir við því að Katie tæki skrefið í stærri deild í Evrópu en svo var ekki.
„Við skoðuðum nokkra kosti, ég og mitt teymi lögðum góða vinnu í það kannski þarf eitthvað að breytast í framtíðinni ætli ég mér að taka það skref. En eins og ég sagði áður er ég ánægð með að vera komin aftur hingað.“
„Í sannleika sagt þá hef ég aldrei vitað hvað ég ætlaði mér að gera ár frá ári. Ég hef verið föst á milli þessa að reyna fyrir mér annars staðar en á sama tíma er hluti af mér sem virkilega líður vel með að vera hér á Íslandi. Ég tek þetta bara ár frá ári og hingað til hef ég alltaf komið aftur. Þetta er fjórða árið mitt hér á landi.“
Þróttur hefur undir stjórn Ólafs Kristjánssonar verið að þétta raðirnar fyrir komandi tímabil og í Katie fær liðið einn allra besta leikmann deildarinnar undanfarin ár. Sigurvegara.
Hvað getur Þróttur afrekað á komandi tímabili?
„Ég tel okkur geta barist um Íslandsmeistaratitilinn. Við höfum yfir að ráða góðum hópi leikmanna. Uppaldir leikmenn eru orðnir árinu eldri og hafa öðlast reynslu, þjálfarateymið er öflugt. Ég tel okkur hafa allt sem þarf, þetta þarf bara að smella saman.“
Trúföst Drottni, Guði og Jesú Krist
Katie er í góðu sambandi við almættið. Trúin er henni mikilvæg.
„Ég á í góðu sambandi við söfnuðinn í Baptistakirkju í Kópavogi. Hef vanið mig á að fara í kirkju þar síðan að ég kom hingað til lands. Kristin trú mín er líklega það mikilvægasta í mínu lífi. Mun mikilvægari en fótboltinn. Ég hef alltaf viljað tengjast trúnni og fylgja henni. Ég hef viljað vera trúföst Drottni, Guði og Jesú.“
„Frá mínum bæjardyrum séð hefur Guð gefið mér getu til að spila fótbolta og ég vil nota þær gjafir sem hann hefur veitt mér til að vinna vel, skemmta mér og reyna að heiðra hann í öllu sem ég geri í lífinu. Ég vil reyna spila eins lengi og ég get og heiðra hann.“
