Nýliðinn heitir Ísak Steinsson og er markvörður Drammen í Noregi, þar sem hann hefur búið mestalla sína ævi. Hann hefur leikið fyrir yngri landslið Íslands og valdi þau fram yfir Noreg.
Snorri tók fram á blaðamannafundi í dag að hann hefði beðið lengur en ella með að velja landsliðshópinn núna vegna meiðsla hjá leikmönnum.
Fjölda sterkra leikmanna vantar í hópinn en Snorri sagði að búast mætti við að það bætist leikmenn við 16 manna hópinn sem hann kynnti í dag. Í hópnum eru Andri Rúnarsson og hægri skytturnar Arnór Snær Óskarsson og Kristján Örn Kristjánsson, auk Ísaks, sem ekki voru á HM í janúar.
Vinstra horn:
Orri Freyr Þorkelsson, Sporting
Stiven Valencia, Benfica
Vinstri skyttur:
Andri Rúnarsson, Leipzig
Aron Pálmarsson, Veszprém
Þorsteinn Leó Gunnarsson, Porto
Miðjumenn:
Janus Daði Smárason, Pick Szeged
Haukur Þrastarson, Dinamo Búkarest
Hægri skyttur:
Arnór Snær Óskarsson, Kolstad
Kristján Örn Kristjánsson, Skanderborg
Hægra horn:
Óðinn Þór Ríkharðsson, Kadetten Schaffhausen
Sigvaldi Guðjónsson, Kolstad
Línumenn:
Elliði Snær Viðarsson, Gummersbach
Ýmir Örn Gíslason, Göppingen
Einar Þorsteinn Ólafsson, Fredericia
Markmenn:
Ísak Steinsson, Drammen
Viktor Gísli Hallgrímsson, Wisla Plock
Gísli Þorgeir Kristjánsson hefur átt við meiðsli að stríða, líkt og Ómar Ingi Magnússon.
Elvar Örn Jónsson var einnig að meiðast og línumaðurinn Arnar Freyr Arnarsson er að komast af stað aftur eftir meiðsli.
Viggó Kristjánsson er einnig meiddur sem og Teitur Örn Einarsson, svo að þrjár af helstu hægri skyttum liðsins eru úr leik vegna meiðsla.
Sveinn Jóhannsson og Bjarki Már Elísson, sem báðir voru í HM-hópnum, eru einnig ekki með núna en báðir meiddust á mótinu.
Björgvin Páll Gústavsson er ekki í hópnum að þessu sinni en þeir Viktor Gísli eru enn bestu markverðir Íslands að sögn Snorra.
Ísland er á góðri leið í átt að sínu fjórtánda Evrópumóti í röð eftir að hafa unnið Bosníu og Georgíu í nóvember.
Nú taka við tveir leikir við Grikkland, 12. mars í Kalkida á eyjunni Evia og svo 15. mars í Laugardalshöll, áður en undankeppninni lýkur svo með tveimur leikjum í maí.
Ísland er efst í sínum riðli með fjögur stig, Grikkland og Bosnía eru með tvö og Georgía án stiga. Efstu tvö liðin fara á EM og liðið í 3. sæti gæti einnig komist þangað.
