Vill auka eftir­lit með þungaflutningum

Eyjólfur segir vegi lifandi fyrirbæri og það sé alltaf verið að þróa nýjar leiðir. Hönnunarleiðbeiningar og staðlar sem notast sé við komi frá Noregi til dæmis en staðfært. Hægt sé að kynna sér leiðbeiningarnar á heimasíðu Vegagerðarinnar. Eyjólfur segir útboðsskilmála alltaf byggja á þessu. Hann segir erfitt að festa þetta í lög því það yrði of flókið.

„Það eru ákveðin atriði sem eru séríslensk fyrirbæri. Það eru blæðingar í bundnu slitlagi hér, algengt á sumrin og veturna, dýpri hjólför,“ segir Eyjólfur og að veðráttan geti haft áhrif á það.

Hann segir loftslag líka öðruvísi hér en í Þýsklandi og Noregi.

Hann segir Vegagerðina vilja leggja meira malbik en bundna slitlagið sé ódýrara. Það sé hægt að leggja fleiri vegi með því að nota það í stað malbiksins.

Fjallað um viðhaldsskuld í stjórnarsáttmála

Hann segir gríðarlega aukningu í umferð vegna fjölgunar ferðamanna og aukningu í þungaflutningum og að það sé fjallað um það í stjórnarsáttmála að það eigi að auka fjárfestingu í samgöngum, hefja framkvæmdir um land allt og vinna á viðhaldsskuld í vegakerfinu.

„Það er viðhaldsskuld í vegakerfinu,“ segir Eyjólfur og að eina leiðin til að vinna að því sé að setja meiri pening í verkefnið.

Hann segir nauðsynlegt að viðhalda virði innviða okkar. Virðið minnki þegar viðhaldið er ekki nægilegt og þannig hafi virði vegakerfisins minnkað með minna viðhaldi.

Hámark þungaflutninga sé 49 tonn og ef það er farið fram yfir það eykst álagið á vegunum í fjórveldisjöfnu og hvert auka tonn auki slit verulega. Frá því að hann tók við samgönguráðherra segist hann hafa verið að skoða þetta. Áður fyrr hafi verið meira eftirlit með þungaflutningum þar sem bílarnir hafi verið vigtaðir af starfsfólki Vegagerðar. Þetta verkefni hafi verið fært til lögreglunnar en hann vill skoða hvort að betra væri að færa það aftur til Vegagerðar eða auka samstarf þessara tveggja aðila. Hann ætli að skoða hvernig þetta hafi gengið hjá lögreglu.

„Um leið og þú ferð fram yfir leyfilegan tonnafjölda eykst álagið á vegina alveg gríðarlega mikið. Það er gríðarlega mikilvægt að allir þungaflutningar séu samkvæmt þeim reglum sem settar eru.“

Hann segir líka umferðina meiri og hún hafi áhrif á viðhaldsskuldina. Hann segir stjórnvöld ætla að verja 40 milljörðum í samgöngur en 27 fari í framkvæmdir og viðhald en 13 í þjónustu. Viðhaldsskuldin nái aftur til hruns en ný ríkisstjórn ætli í átök í þessum málum.

Eyjólfur nefndi það undir lokin að hann vildi skoða strandsiglingar. Viðtalið við Eyjólf er lengra og er hægt að hlusta á það að ofan.