Ósakhæfur þegar hann olli á­rekstri og lagði líf konu í rúst

Áreksturinn sem málið varðar átti sér stað þegar maðurinn ók um Snæfellsnesveg til suðurs við Brúarland í Borgarbyggð árið 2022.

Manninum var gefið að sök að aka bílnum undir áhrifum kannabisefna og slævandi lyfja án nægilegrar aðgæslu og varúðar þannig að hann fór yfir á rangan vegarhelming þannig að bíll mannsins hafnaði á öðrum bíl sem kom úr gagnstæðri átt.

Líkt og áður segir slasaðist konan, sem var ökumaður hins bílsins, alvarlega, en í ákæru segir að hún hafi hlotið „mörg brot ávinstri fótlegg, mörg brot á vinstri lærlegg, brot sem ná til margra svæða á vinstri ganglim, úlnliðsbrot vinstra megin, marga yfirborðsáverka á vinstri mjöðm og læri, tognun á lendhrygg og mjaðmagrind, mar á vinstri fæti og lungnablóðrek.“ Jafnframt hlaut farþegi bíls hennar, önnur kona, einhverja áverka.

Þvingaði næstum því annan af veginum skömmu áður

Aðstæðunum er lýst þannig í dómnum að þegar lögregla hafi komið á vettvang rúmum tíu mínútum eftir að slysið varð hafi báðir bílarnir verið utan vegar.

Báðir ökumennirnir voru fastir í bílum sínum og annar þeirra, maðurinn sem var ákærður, var fluttur með þyrlu Landhelgisgæslunnar á Landspítalann.

Í bíl hans fundust ómerktir pakkar með lyfskyldum slævandi lyfjum.

Þá bárust lögreglu upplýsingar um að fyrr sama dag hefði bíl mannsins verið ekið með óstöðgum hætti og hann farið yfir rangan vegarhelming. Og skömmu fyrir áreksturinn hefði hann næstum því þvingað annan ökumann af veginum.

Neitaði sök vegna ósakhæfis

Maðurinn gekkst við atvikalýsingu ákærunnar að öllu leyti, en neitaði sök á grundvelli ósakhæfis. Hann sagðist sjá eftir atburðunum og finnast leiðinlegt að konan hefði hlotið alvarleg meiðsli.

Hann var einnig ákærður fyrir önnur minniháttar umferðar- og fíkniefnalagabrot, en hann játaði sök í þeim.

Slysið hafi rústað lífi hennar

Konan sem slasaðist alvarlega gaf líka skýrslu fyrir dómi. Hún sagðist hafa verið að keyra heim á leið frá Reykjavík ásamt hinni konunni sem var í farþegasætinu. Allt í einu hafi hún séð bíl koma á móti sér sem var á hennar vegarhelmingi, og farþeginn sagt: „Hann er að koma á okkur.“

Konan sagði að sér hefði dauðbrugðið og þetta gerst mjög hratt. Hún hefði reynt að fara eins mikið út í kant og hún mögulega gat, en vegkanturinn verið svo hár að hún komst ekki útaf.

Síðan hafi bíllinn skollið á henni og áreksturinn orðið. Svo hafi hún opnað augun og séð að allt væri út um allt og hún ekki vitað hvað væri að gerast. Hún sagðist hafa verið mjög verkjuð og virkilega hrædd því hún vissi ekki hversu mikið slösuð hún væri.

Fram kom að konan hafi verið í fullri vinnu, og nýlega lokið við ótilgreinda BS-gráðu. Svo virðist sem námið hafi varðað það sem hún hafði hugsað sem hennar framtíðarvinnu. Það væri nú í uppnámi. Konan sagði að henni fyndist lífiF sínu hafa verið rústað, og að hún geti ekki seð hvað hún geti gert í framtíðinni.

Fram kemur í dómnum að konan glími við verulega og varanlega örorku eftir slysið.

Vissi ekki hvað hann væri að gera

Geðlæknir sem vann matsgerð fyrir dóminn gaf líka skýrslu. Hann sagði manninn eiga mjög flókna sögu, sem varðaði bæði fíkniefnanotkun og geðræna örðugleika.

Það var ljóst að mati læknisins að maðurinn hefði ekki haft neina stjórn á skapi sínu þegar slysið varð, og að það mætti segja að hann hafi ekkert vitað hvað hann væri að gera. Þó hann hafi verið alls ófær um að stjórna gjörðum sínum þá hafi hann fullt innsæi í þær í dag, og nú átti hann sig á því hvað sé rétt og rangt.

Með vísan til mats geðlæknisins komst héraðsdómur að þeirri niðurstöðu að rétt væri að sýkna manninn af kröfu ákæruvaldsins um refsingu í málinu vegna ósakhæfis.

Þrátt fyrir ósakhæfið komst dómurinn að þeirri niðurstöðu að það leysti hann ekki undan ábyrgð á tjóninu sem hann olli konunni. Því ætti hann að greiða henni miskabætur, þrjár milljónir króna.