Freyr gaf KSÍ tveggja sólar­hringa frest: „Ég stóð bara við mín orð“

Freyr hafði íhugað að taka sér hlé frá þjálfun fram á næsta sumar þegar að leiðir hans og Kortrijk skildu í síðasta mánuði en áhuginn á hans kröftum var mikill og áhugaverðir valkostir komu inn á borðið sem erfitt var að hundsa. Einn þeirra valkosta var hjá Brann en Freyr átti einnig fund með forráðamönnum KSÍ.

„Þetta hefur verið langt ferli,“ segir Freyr í samtali við íþróttadeild en nánar verður rætt við hann í Sportpakkanum í kvöld að loknum kvöldfréttum Stöðvar 2. „Ég hætti hjá Kortrijk 17.desember og daginn eftir hafa forráða­menn Brann sam­band við mig. Ég man ekki alveg hvenær KSÍ hafði sam­band við mig en svo voru einnig önnur lið sem höfðu sam­band. Eitt­hvað sem ég átti ekkert alveg von á.

Ég vildi að sjálfsögðu tala við þá sem höfðu áhuga og svo eftir áramót fóku­seraði ég á Ís­land og Brann. Svo kemur síðasta vika. Áður en ég ákveð að fara til Brann fer ég til Ís­lands og hitti loksins fólkið hjá KSÍ. Við áttum frábæran fund. Ég er með mjög skýra sýn á það hvernig eigi að gera hlutina með ís­lenska lands­liðinu og hvernig ég hefði viljað taka það áfram. Forráða­menn Brann voru mjög þolin­móðir fram að þeim fundi af því að ég þurfti líka bara fjöl­skyldunnar minna vegna að gera það al­menni­lega upp við mig hvað ég vildi.“

Ferlið með Brann hafi verið mjög langt og mjög ítar­legt. 

„Fag­legt í alla staði og tók langan tíma en þeir biðu í nokkra daga og ég fundaði með KSÍ. En eftir þann fund var ég mjög heiðar­legur og sagði að ég hefði ekki tíma í að bíða lengur en í 48 klukku­stundir eftir því að vera boðið starfið eða ekki svo ég gæti valið á milli ef ég vildi það. Ég stóð bara við mín orð. Gaf þeim mögu­leika á því en ákvað að velja síðan Brann á föstu­dagskvöldið síðastliðið.“

„Ég brenn fyrir íslenska landsliðið“

Ef þú hefðir haft val um annað hvort Brann eða ís­lenska lands­liðið, hefðirðu valið ís­lenska lands­liðið?

„Ég er ekki viss um það. Ég get ekki sagt það fullum fótum. Þetta var bara 50/50 fyrir mig. Það vita það allir sem þekkja mig að ég brenn fyrir ís­lenska lands­liðið og mun alltaf verða stuðnings­maður þess. En þetta starf hjá Brann er bara þess eðlis að ég var mjög spenntur fyrir því og var mjög heiðar­legur gagn­vart stjórn KSÍ varðandi það. Ég er bara mjög ánægður með að hafa ákveðið að fara hingað.“

Hvernig skilurðu þá við þessar viðræður við KSÍ. Ertu sáttur við það hvernig þær fóru fram og hvernig ferlið var eða er eitt­hvað sem situr eftir?

„Ég er alveg sáttur við það ferli, skil bara vel við það og er búinn að tala við Þor­vald, for­m KSÍ og styð sam­bandið, ís­lenska lands­liðið og verðandi lands­liðsþjálfara fullum fetum.“