Grét og sagði líf sitt búið eftir að hafa stungið þrjá

Á nýjársdag var greint frá því að hnífstunguárás hefði verið framin á Kjalarnesi og tveir særst, þar af einn alvarlega.

„Svo virðist sem ósætti og ágreiningur hafi komið upp hjá mönnum í húsinu og í framhaldinu var hnífi beitt. Nokkrir hlutu áverka, en einn þó sýnu verst og er sá alvarlega slasaður eftir atlöguna. Hinir handteknu eru allir á fimmtugsaldri, rétt eins og sá sem slasaðist mest,“ sagði í tilkynningu lögreglu.

Landsréttur hefur nú staðfest gæsluvarðhaldsúrskurð yfir manninum, sem gildir til og með 4. febrúar næstkomandi.

Tveir fluttir á bráðamóttöku

Í úrskurðinum segir að þegar lögregla kom á vettvang aðfaranótt 1. janúar hafi einn brotaþola verið í anddyri hússins með stungusár á brjóstkassanum. Hann hafi verið fluttur á bráðamóttöku. Annar brotaþoli hafi verið inni í húsinu með ákomu í andlitinu og skurð á bakinu sem virtust vera eftir hníf. 

Íbúi í hverfinu hafi þá komið og sagt lögreglu að þriðji brotaþolinn hefði komið til hans og væri með stungusár á bakinu. Sá hafi verið fluttur á bráðamóttöku.

Tók upp hníf vegna þess að hinn var stór og sterkur

Í úrskurðinum segir að maðurinn hafi verið handtekinn á vettvangi. Á peysu hans hafi verið sjáanlegir blóðblettir á vinstri framhandlegg. Honum hafi verið kynnt réttarstaða sakbornings, sem hann hafi skilið. Hann hafi blásið 1,22 prómil í áfengismæli. 

Hann hafi greint frá því að hann hefði stungið tvo karlmenn sem hafi ráðist að honum og að hann hafi gert það í sjálfsvörn. 

Hann hafi sagt margt fólk hafa verið saman í teiti og allt hafi verið í góðu. Síðan hafi tveir sem hafi verið gestkomandi farið að vera ógnandi og hafi ráðist að honum í eldhúsinu. Annar þeirra hafi stappað á brjóstkassa hans og þá hafi hann reiðst og varið sig með hníf. Hann hafi sagt að það hafi verið vegna þess að maðurinn hafi verið stór og sterkur. 

„Meðan á frásögn varnaraðila stóð grét hann og kvað líf sitt vera búið. Var hann fluttur á slysadeild til skoðunar vegna verks í rifbeini og síðan á lögreglustöð.“

Blóð úti um allt

Daginn eftir hafi verið tekin skýrsla af manninum á lögreglustöð. Þá hafi hann greint frá því að atvik hefðu orðið í stofu hússins. Þrír menn hafi slegist og hann hafi reynt að fá þá til að hætta.

„Einn þeirra hafi ýtt honum með þeim afleiðingum að hann hafi dottið hjá ísskápnum. Þeir hafi haldið áfram að berjast og það hafi verið blóð út um allt.“

Hann hafi fengið spark í kviðinn. Hann hafi reynt að standa upp og það hafi verið hnífur fyrir framan hann, sem hann hafi tekið upp. Hann hafi óttast að mennirnir myndu drepa hann og að hann vissi ekki hvað hefði gerst vegna þess að hann hefði verið í áfalli.

Í annarri skýrslutöku hafi maðurinn sagst ekki vita til þess að hann hafi stungið mennina þrjá en að það hlyti að vera.

Í staðfestum úrskurði segir að maðurinn sé sterklega grunaður um að hafa framið brot sem fangelsisrefsing liggur við og því væri gæsluvarðhald nauðsynlegt með tilliti til almannahagsmuna.