Ein sleppur en mæðgurnar skulda tugi milljóna

Mál kvennanna þriggja hefur vakið talsverða athygli, enda var um að ræða greiðslur upp á þriðja hundrað milljóna króna, sem ekki voru taldar fram á skattframtölum kvennanna.

Héraðssaksóknari ákærði konurnar þrjár í október síðasta árs fyrir meiriháttar brot á skattalögum. Einni þeirra, 27 ára konu skráðri til heimilis á Selfossi, var gefið að sök að hafa ekki talið fram 132 milljónir króna tekjuárin 2016 og 2017.

Auk konunnar sæta íslenskar mæðgur ákæru fyrir svipuð brot. Um er að ræða Írisi Heru Norðfjörð Jónsdóttur, sem rak veitingastaðinn Kryddlegin hjörtu við góðan orðstír í fjölda ára, og dóttur hennar Brynju Norðfjörð Gunnarsdóttir. Þær voru ákærðar fyrir að ekki talið fram gjafir upp á fimmtíu milljónir króna annars vegar og þrjátíu hins vegar.

Brynja steig fram í viðtali við DV skömmu eftir að ákæra var gefin út og sagði málið henni og móður sinni afar þungbært. Hún hafi hreinlega ekki vitað að telja þyrfti gjafir fram sem tekjur.

Gat framvísað samningi um lán

Konan sem fékk mest lagt inn á reikning sinn frá auðmanninum var sem áður segir sýknuð. Því er hún ekki nafngreind í dóminum.

Í dóminum segir að konan hafi borið fyrir sig að um lánagreiðslur hafi verið að ræða og framvísað samningi þess efnis. Í málinu hafi legið fyrir skattframtöl konunnar fyrir árin sem um ræddi. Þar hafi hún talið umræddar fjárhæðir frá auðmanninum fram sem skuldir.

Líklega gjöf 

Í dóminum segir að af gögnum málsins, sem og hinum „mjög svo óvenjulega“ lánasamningi sem lá fyrir í málinu, mætti vissulega draga þá ályktun að líklegt sé að um hafi verið að ræða gjöf en ekki lán, enda liggi fyrir að skattyfirvöld, þar með talið Yfirskattanefnd, hafi hafnað því að um hafi verið að ræða lán. 

Því hafi verið slegið föstu við meðferð málsins hjá skattyfirvöldum að um hafi verið að ræða gjöf og fjármunirnir hafi verið skattlagðir samkvæmt því. Í sakamáli verði hins vegar ekki sakfellt nema fram sé komin nægileg sönnun, sem ekki verði vefengd með skynsamlegum rökum, um hvert það atriði sem varðar sekt ákærðs manns.

Að mati dómsins væri ekki fram komin nægileg sönnun, sem ekki verði vefengd með skynsamlegum rökum, um að téðir fjármunir hafi verið gjöf en ekki lán og þar með ekki hafið yfir skynsamlegan vafa að konan hafi gerst sek um þá háttsemi sem henni er gefin að sök í ákæru. Því var hún sýknuð.

Önnur játaði

Brynja játaði skýlaust þá háttsemi sem henni var gefin að sök í ákæru og því var talin komin fram sönnun fyrir því að hún væri sek.

Hún lét undir höfuð leggjast að telja fram sem skattskyldar gjafir greiðslur frá auðmanninum, 13.145.000 krónur á gjaldárinu 2016 og 16.304.900 krónur á gjaldárinu 2018, eða samtals 29.449.900 krónur. Með því kom hún sér undan greiðslu um ellefu milljóna króna í tekjuskatt.

Hún var dæmd til sex mánaða skilorðsbundinnar fangelsisvistar og greiðslu 22 milljóna króna fésektar í ríkissjóð.

Móðirin skuldar talsvert meira

Í dóminum segir að Íris Hera hafi aftur á móti haldið uppi vörnum í málinu og borið fyrir sig að um lán en ekki gjafir hafi verið að ræða. 

Ekki hafi legið fyrir neinn skriflegur samningur eða nein skjalleg gögn sem geti rennt stoðum undir ætlaða lánveitingu.Í þessu efni beri þó að nefna að í gögnum málsins sé að finna óundirritað og ódagsett skjal hvers efni sé að maðurinn staðfesti að hafa lánað Írisi heru 421.638 bandaríkjadali, en í yfirlýsingunni segi að lánið sé opið, á ensku „open ended“, það er að hún muni endurgreiða þegar hún geti það í framtíðinni. Að mati dómsins lýsi efni þessa skjals ekki láni heldur gjöf.

Með vísan til þess og atvika málsins taldi dómurinn að sannað væri að Íris Hera hafi framið þau brot sem lýst var í ákæru.

Hún var því dæmd til tíu mánaða skilorðsbundinnar refsingar og greiðslu 42 milljóna króna fésektar í ríkissjóð. Hún vantaldi greiðslur upp á alls 52 milljónir króna og kom sér hjá greiðslu 21 milljónar króna.