Flateyringum ráð­lagt að sjóða neyslu­vatn

Vegurinn var opnaður á ný í morgun og að sögn lögreglu hafa engar nýjar skriður fallið á svæðinu svo vitað sé.

Vegurinn var lokaður í fyrrinótt og framan af morgni í gær eftir nokkur skriðuföll. 

Skriður hafa einnig mengað vatnsból á Vestfjörðum og í gærkvöldi var stefnt að því að hleypa vatninu á á Flateyri að nýju um miðnætti. Áður hafði vatni verið komið á með því að dæla úr tankbíl en í gær var farið í að tæma tankinn sem sér bæjarbúum fyrir vatni og hreinsa hann af drullu. 

Vatnið verður þó ekki sótthreinsað fyrr en í dag, að því er segir á heimasíðu Ísafjarðarbæjar og því eru Flateyringum bent á að sjóða allt neysluvatn. Sérstök tilkynning verður svo send þegar óhætt er að hætta slíkri suðu.