Sam­herji hvetur Odd Ey­stein til frekari verka

Málflutningur í máli Samherja gegn Oddi Eysteini, sem gengur undir listamannsnafninu Odee, fór fram í London í gær. Samherji höfðaði málið eftir að Oddur sendi út afsökunarbeiðni í nafni fyrirtækisins vegna framgöngu þess í Namibíu.

Afsökunarbeiðnin og vefsíða sem Oddur smíðaði og lét líta út fyrir að vera á vegum Samherja var hluti af útskriftarverkefni hans við Háskólans í Björgvin í Noregi. Vefsíðan var með ensku léni og fyrir vikið er málið tekið fyrir af dómstólum í Bretlandi. 

Oddur hefur ítrekað reynt að blekkja fjölmiðla með fölskum fréttatilkynningum sem hann hefur sent út, nú síðast í nafni bandarísku kaffihúsakeðjunnar Starbucks.

Samherji segir í tilkynningu rétt að greina frá því að í misnotkun hafi ekki aðeins falist listrænn tilgangur eins og Oddur hafi haldið fram.

„Því auk þess var reynt að hafa fé af Samherja með því að fela auglýsingastofu birtingu á auglýsingaefni af sama tagi gegn greiðslu frá Samherja,“ segir í tilkynningu á vef Samherja.

Átt fárra kosta völ

Við slíkt sé að sjálfsögðu ekki hægt að una og hafi ekkert með list eða tjáningarfrelsi að gera.

„Vörumerki Samherja hefur verið byggt upp á liðlega fjórum áratugum um allan heim og skylda félagsins er að verja lögbundið vörumerki félagsins.“

Samherji hafi átt fárra kosta völ en að leita til dómstóla, sem sé hinn hefðbundni vettvangur til úrlausna deilumála.

„Samherji hafði engan áhuga á að höfða ofangreint mál gegn Oddi Eysteini umfram það að fá hann til að leiðrétta vísvitandi brot sín og bauð honum að ljúka málinu utan dómstóla með því að afhenda Samherja lénið og gangast við því að endurtaka ekki brot sín. Oddur hefur kosið að hafna því og taka til varnar í málinu.“

Virða réttindi samborgara

Samherji styðji stjórnarskrárvarið tjáningarfrelsi listamanna og annarra og taki enga afstöðu með eða á móti listaverkum einstakra aðila.

„En hér var um að ræða víðtækt alvarlegt brot sem ekki var hægt að réttlæta með vísunum til listrænnar tjáningar,“ segir í tilkynningunni.

Samherji hvetji til listrænna sköpunar og hafi haft það að samfélagslegu markmiði að styðja við listamenn í gegnum árin.

„Hvetur Samherji Odd Eysteinn til frekari verka en um leið að virða réttindi og störf annarra samborgara sinna samhliða listsköpun sinni.“

Afsökunarbeiðnin sem Oddur gaf út í nafni Samherja tengdist ásökum á hendur sjávarútvegsrisanum vegna spillingarmála í Namibíu. Fulltrúar fyrirtækisins voru sakaðir um að bera fé á áhrifamenn þar til þess að tryggja sér aflaheimildir.

Bandalag íslenskra listamanna lýsti yfir stuðningi við Odd í sumar og hvatti Samherja til þess að láta málið gegn honum falla niður. 

Sjálfur hefur Oddur safnað fjármagni til að standa straum af réttarhöldunum. Hann hefur safnað 2900 pundum á vefsíðunni Crowdjustice og 58 þúsund norskum krónum á GoFundme. Samanlagt um 1275 þúsund íslenskum krónum.