Grunaður um að hafa orðið stúlku á grunn­skóla­aldri að bana

Þetta staðfestir Grímur Grímsson, yfirlögregluþjónn miðlægrar rannsóknardeildar Lögreglunnar á höfuðborgarsvæðinu, í samtali við Vísi. Ríkisútvarpið greindi fyrst frá málinu.

Grímur segir að rannsókn málsins sé á frumstigi og að enn eigi eftir að ákveða hvort farið verði fram á gæsluvarðhald yfir þeim grunaða.

Í frétt Ríkisútvarpsins er haft eftir heimildum að hinn grunaði hafi hringt sjálfur á lögreglu og tilkynnt andlátið. Grímur kveðst ekki geta staðfest það.

Að sögn Helenu Rósar Sturludóttur, upplýsingafulltrúa Ríkislögreglustjóra, aðstoðaði sérsveit Ríkislögreglustjóra Lögregluna á höfuðborgarsvæðinu í útkallinu.

Að neðan má sjá tilkynningu frá lögreglu vegna málsins á tíunda tímanum í morgun:

Lögreglan á höfuðborgarsvæðinu er með til rannsóknar andlát stúlku á grunnskólaaldri.  Tilkynnt var um málið um kvöldmatarleytið í gær og í kjölfarið var einn handtekinn í tengslum við það.  Rannsókn málsins er á frumstigi og ekki verða veittar frekari upplýsingar að svo stöddu.