Segir oft allt­of marga uppi á jökli og inni í íshellum

Hann segir að eins og öðrum landsmönnum hafi honum verið brugðið yfir íshellaslysinu síðustu helgi við Breiðamerkurjökul. Bandarískt par varð undir ísnum. Karlmaðurinn var úrskurðaður látin á vettvangi en unnusta hans flutt slösuð á slysadeild í Reykjavík. Hún er þungið. 

Borgar segir slysið ekki hafa þurft að eiga sér stað. Það sé afar sorglegt að hugsa til þess. Borgar fór yfir þessi mál í Bítinu á Bylgjunni í morgun. 

„Það er vegna þess að við höfum ekki stundað þessar ferðir á sumrin, þessi fyrirtæki sem eru í þessum íshellaferðum, einfaldlega af því að þetta er það hættulegt að við getum ekki tryggt öryggi gesta í þessum ferðum,“ segir Borgar.

Hann segir einhverja hafa farið af stað og aðrir hafi fylgt. Það hafi einhverjir reynt þetta í fyrra en það hafi ekki sami fjöldi farið í þær ferðir og þær hafi ekki verið á eins löngu tímabili. Sjálfur segist hann opna fyrir bókanir í október og það sé opið fram í mars. Það sé talinn öruggur tími.

„En svo getur alveg verið heitt vor og ísinn orðinn svona sumarlegur fyrr sko, þá bara aflýsir maður þeim ferðum og borgar gestum til baka. Segir því miður og það er ekki öruggt að fara í ferð.“

Borgar segir ekki sanngjarnt að henda Vatnajökulsþjóðgarði undir rútuna í þessu máli. Það hafi verið leyfi í gildi en flestir sem stundi þessar ferðir hafi vitað og virt það að ekki væri öruggt að fara í þessar ferðir þannig það hafi ekki þurft að banna það. Þeir sem stundi íshellaferðir á veturna fari yfirleitt í aðra starfsemi á sumrin eins og jöklagöngur, jeppaferðir, snjósleðaferðir eða jafnvel kajakferðir.

Fyrirtækin sjálf beri ábyrgð

„Þeir sem bera eingöngu ábyrgð á þessu slysi eru þeir sem buðu upp á þessar ferðir í sumar og það eru nokkur fyrirtæki,“ segir Borgar.

Borgar er sjálfur að aka gestum úr skemmtiferðaskipum á Djúpavog í sumar og segist því ekki vita eða hafa heyrt af gagnrýnisumræðu á þessar ferðir í sumar.

Borgar hefur farið í íshellaferðir í átta ár. Hann segir margt mega bæta í rekstri þeirra. Sem dæmi sé einn leiðsögumaður yfirleitt með of marga með sér.

„Einn leiðsögumaður hefur ekkert með fjórtán manns að gera inni í íshelli,“ segir hann og að hámark ætti að vera um tíu manns. Hann segir Vatnajökulsþjóðgarð þurfa að taka þetta til skoðunar.

Vantar allt eftirlit

Hvað varðar nám í þessum fræðum segir Borgar að öllum beri að fara á námskeið en það sé enginn að athuga hvort fólk sé með þessa pappíra í gildi eða hvort menn séu með meira próf til að meira aka fólkinu að hellinum eða upp á jökul.

„Þetta eftirlit vantar og þarna vantar valdheimildir til svæðisráðsins á Hornafirði. Þannig að þjóðgarðsvörður og landverðir á Breiðamerkurjökli og Breiðamerkursandi megi athuga svona mál.“

Hann segir að það sem fyrirtækin eigi að vera að gera sé að selja gestum upplifun. Það sé verið að troða allt of mörgum inn á jökul í einu. Hann segir „heimafyrirtækin“ hafa farið fram á það fyrir fjórum árum að þjóðgarðurinn setti takmörk um fjölda. Það hafi verið sett af stað vinna við það en vegna stjórnvaldskæru frá einu stærsta ferðaþjónustufyrirtækinu hafi sú vinna ekki farið lengra.

Borgar segist vona að ráðherra ferðamála taki þessi mál til skoðunar. Ef það þurfi að breyta lögum þá verði að gera það.

„Þetta er eins og villta vestrið stundum.“