Grafalvarlegt mál og við­komandi hvattur til að gefa sig fram

Á annað hundrað manns komu að tæplega sólarhrings langri leit að tveimur ferðamönnum sem tilkynntu Neyðarlínunni að þeir væru lokaðir inni í helli nærri Kerlingarfjöllum og annar aðilinn væri slasaður. Í hönd fór mikið útkall þar sem björgunarsveitarfólk streymdi í Kerlingarfjöll á miðhálendinu, þyrla Landhelgisgæslunnar var kölluð til, rætt var við hellasérfræðinga og leitað um allt með drónum.

Sveinn Kristján Rúnarsson er yfirlögregluþjónn hjá Lögreglunni á Suðurlandi sem stýrði aðgerðum. Hann segir að þegar farið sé í leit sem þessa fari samhliða af stað rannsókn þar sem tilkynningin sé könnuð og reynt að viða að sér eins miklum upplýsingum og hægt er um atvikin og þá sem leitað er að. Skildi viðkomandi eftir ferðaplan eða annað slíkt.

Rýr tilkynning

„Það gerðum við í þessu tilviki en tilkynningin sem slík er frekar rýr. Hún segir ekki mikið,“ segir Sveinn Kristján. Komið hafi fram að um tvo aðila væri að ræða, annar slasaður og gefin hafi verið upp staðsetningarhnit.

„Við svo á að þarna sé um neyð að ræða og bregðumst þannig við,“ segir Sveinn Kristján.

Samkvæmt heimildum fréttastofu kviknaði grunur hjá leitaraðilum fyrir hádegi í gær að mögulega væri um gabb að ræða. Það var þó ekki fyrr en á sjötta tímanum sem lögregla upplýsti um það og að leitinni hefði verið hætt.

Sveinn Kristján segir að leitin hafi ekki verið blásin af fyrr en allar vísbendingar sem unnið var eftir hafði verið fylgt. Sú síðasta var bílaleigubíll í Kerlingarfjöllum sem ekki lá fyrir hver ætti. Þegar eigendur skiluðu sér á bílastæðið eftir dagsgöngu um svæðið var ljóst að ekki væri um að ræða fólkið sem leitað hafði verið að.

Allar heimsóknir á netið skilji eftir sig fótspor

Sveinn Kristján segir lögreglu ekki hafa staldrað sérstaklega við að skilaboð hafi komið inn á vef Neyðarlínunnar sem send voru úr helli á hálendinu.

„Það er sem betur fer í sjálfu sér auðvelt að senda aðstoðarbeiðni ef fólk er í neyð. Svo fer þetta eftir því hvar þú ert staðsettur varðandi síma- og netsamband. En það getur verið ágætissamband inni í helli ef þú ert á góðu sambandssvæði,“ segir Sveinn. Það sé víða orðið nokkuð gott á hálendinu.

Að neðan má sjá umfjöllun um leitina í kvöldfréttum Stöðvar 2 í gær augnablikum áður en lögregla blés leitina af og tilkynnti að líkast til væri um gabb að ræða.

Ekki liggur fyrir hver sendi skilaboðin en lögreglan heldur áfram rannsókn sinni á því. Samkvæmt heimildum fréttastofu er möguleiki á að skilaboðin hafi verið send úr borðtölvu en ekki síma.

„Allar heimsóknir á netið skilja eftir sig einhver fótspor. Það er kannski enginn stórkostlegur munur á því hvort það sé sími eða tölva, símar eru orðnir tölvur. Það er þetta sem við erum að skoða núna og fara í gegnum þetta,“ segir Sveinn Kristján.

Verið sé að skoða bakgrunn boðanna.

Grafalvarlegt mál

Sveinn Kristján fer ekki í neinar grafgötur með það hve alvarlegt gabb á borð við þetta sé.

„Við lítum þetta mjög alvarlegum augum. Þetta eru á annað hundrað manns sem eru að leggja sig í hættu, fara úr vinnu, gefa sig alla í að leita eftir einhverju,“ segir Sveinn. Gabb eins og þetta sé brot á almennum hegningarlögum og varði allt frá sektum upp í þriggja mánaða fangelsisvist.

„Við sem erum í þessum viðbragðsgeira verðum að treysta að boð til okkar séu sönn og rétt,“ segir Sveinn Kristján. Viðbragðið sé sent út í samræmi við beiðnina.

„Þegar beiðnin er óljós en lýsir neyð þá að sjálfsögðu setjum við alla okkar krafta í samræmi við það. Þetta snýst fyrst og fremst um það að koma fólki til hjálpar.“

Göbb á borð við þessi séu mjög sjaldgæf, sem betur.

„Við rifjuðum upp í morgun að fyrir um tuttugu árum kom hjálparbeiðni um hóp sem átti að vera á hálendinu sem var aldrei neitt.“

Á dögunum kom upp mál hjá lögreglunni á höfuðborgarsvæðinu þar sem lögreglubíll lenti í harkalegum árekstri á leið í útkall sem enginn fótur reyndist fyrir.

Sveinn segir aðspurður mæla með því að viðkomandi gefi sig fram við lögreglu.

„Það myndi gera öllum gott. Bæði fyrir okkur að fá ljúkingu á málið og eins fyrir björgunarsveitir að vita að það sé endanlega niðurstaða.“

Sveinn ræddi málið einnig í Bítinu á Bylgjunni í morgun.