Aukinn við­búnaður til að bregðast við eggvopnaógn

„Menn hafa auðvitað áhyggjur af veðurspánni. Það verður allt erfiðara ef það er mjög blautt eða vindur. Það gerir allt svolítið þyngra,“ segir Karl Gauti Hjaltason lögreglustjóri í Vestmannaeyjum í samtali við fréttastofu. Óhætt er að segja að veðurspáin yfir helgina í Vestmannaeyjum hafi oft verið fýsilegri.

„Þessa dagana erum við að beina sjónum okkar að því að koma í veg fyrir að þessi eggvopnamenning berist hingað. Við erum með viðbúnað gagnvart því og aukinn viðbúnað lögreglu til að bregðast við ef það gerist,“ segir Karl Gauti. 

Síðdegis í dag koma fleiri lögreglumenn til Vestmannaeyja til að standa vaktina yfir helgina að sögn Karls Gauta, sem segir undirbúning í fullum gangi.

„Það er búið að reisa tjaldsúlurnar og setningin er á morgun. Þannig að undirbúningur er á fullu.“