Bjart­mar ráðinn að­stoðar­fram­kvæmda­stjóri

Í fréttatilkynningu um vistaskiptin segir að Bjartmar sé með víðtæka reynslu úr atvinnulífinu og hafi meðal annars starfað hjá dómsmálaráðuneytinu, innanríkisráðuneytinu, Útlendingastofnun, Óbyggðanefnd og sem fangavörður á Litla Hrauni.

Lögfræðingur með reynslu af húsasmíði 

Eins hafi hann unnið við húsasmíði og verið á árunum 2017 til 2020 framkvæmdastjóri Rekstrarumsjónar ehf. og sitji enn í dag sem stjórnarformaður félagsins. Ásamt því að vera með meistaragráðu í lögfræði frá Háskóla Íslands hafi hann lokið námi með próftöku til gerðar eignaskiptayfirlýsinga. Bjartmar hafi lokið stúdentsprófi frá Menntaskólanum í Reykjavík árið 2007.

„Ég hlakka mikið til að takast á við allar þær áskoranir sem þessi nýja staða hjá Malbikstöðinni færir mér í fang. Framundan eru stór verkefni og áframhaldandi uppbygging fyrirtækisins á spennandi markaði. Það er mér mikill heiður að fá að vinna með öllu því flotta fólki sem starfar hjá fyrirtækinu en Malbikstöðin er að mínu mati eitt mest spennandi fyrirtækið hér á landi í mannvirkjagerð og innviðauppbyggingu,“ er haft eftir  Bjartmari.

Oft verið þörf en nú nauðsyn

Í tilkynningu segir að Malbikstöðin sé leiðandi í umhverfisvænni framleiðslu malbiks hér á landi og leggi fyrirtækið ríka áherslu á gæði og þjónustu og hafi ávallt umhverfissjónarmið að leiðarljósi í allri sinni starfsemi. Haft er eftir Vilhjálmi Þór Matthíassyni, framkvæmdastjóra og eiganda Malbikstöðvarinnar, að  ráðning Bjartmars sé afar kærkomin og nauðsynleg, enda hafi fyrirtækið verið í miklum vexti að undanförnu.

„Ég er virkilega ánægður með að fá Bjartmar til okkar enda öflugur og reynslumikill einstaklingur sem gott er að starfa með og eiga í samskiptum við. Oft var þörf á að fá inn aðstoðarframkvæmdastjóra en nú er nauðsyn og að mínu viti er Bjartmar einmitt rétti einstaklingurinn til starfans.“