Stýrir rekstrarsviði Skeljungs

Í fréttatilkynningu þess efnis segir að Ingunn Þóra hafi starfað hjá Skeljungi frá október 2022 sem sjálfbærni og öryggisstjóri. Ingunn Þóra sé viðskiptafræðingur að mennt og hafi áður starfað hjá Landsbankanum.

Krefjandi verkefni framundan

„Stefna okkar hjá Skeljungi er að þjóna orkuþörf fyrirtækja á hagkvæman og öruggan máta í sátt við samfélagið og umhverfið. Starfsemi Skeljungs er víðfeðm, við sjáum um dreifingu, innkaup og heildsölu á eldsneyti, smurolíum, hreinsi- og efnavörum, áburði sem og öðrum vörum og þjónustuþáttum til fyrirtækja, bænda, útgerða, flugiðnaðar sem og aðila í verktöku. Þau gildi sem við viljum hafa að leiðarljósi eru jákvæðni, metnaður og að við séum ávallt tilbúin í breytingar. Hjá félaginu starfa í dag tæplega 70 manns og eru þau gildi sem við setjum okkur mikilvægur þáttur í því að byggja upp menningu sem styður við hagkvæman rekstur og ekki síst þær nauðsynlegu breytingar sem þarf að vinna að í átt að aukinni sjálfbærni - til hagsbóta fyrir umhverfið og samfélagið,“ er haft eftir Þórði Guðjónssyni, forstjóra Skeljungs.

Með ráðningu Ingunnar Þóru vilji Skeljungur leggja enn meiri áherslu á gæði í rekstri Skeljungs ásamt því að efla þjónustu við viðskiptavini félagsins með framúrskarandi þjónustu. Framundan séu fjölbreytt krefjandi verkefni sem verði spennandi að fást við.

Sjálfbærnin fer til móðurfélagsins

„Ég hlakka til að leiða rekstarsvið og láta verkin tala með því góða fólki sem starfar hjá þar. Öryggis- og gæðamál eru í fyrirúmi þegar unnið er með eldsneyti og það er mikilvægt að rýna það sem vel er gert, koma augu á það sem betur má fara og setja okkur markmið um að gera enn betur,“ er haft eftir Ingunni Þóru.

Í tilkynningunni segir samhliða breytingunni færist sjálfbærnimál Skeljungs til móðurfélags félagsins, Styrkáss. Þar sem þau tilheyri sviði innri þjónustu sem sinni stoðþjónustu þvert á félög samstæðunnar í sjálfbærnimálum, mannauðsmálum, samhæfingu markaðsmála og verkefnastýringu lykilverkefna. Framkvæmdastjóri innri þjónustu hjá Styrkás sé Jóhanna Helga Viðarsdóttir.