Gerður Björt nýr framkvæmdastjóri rekstrarþjónustu Wise

Greint var frá því á dögunum að Wise og Þekking hefðu sameinast, en á síðasta ári var tilkynnt um kaup Wise á öllu hlutafé Þekkingar. Sameiningin var háð samþykki Samkeppniseftirlitsins, sem lá fyrir síðasta haust.

Í fréttatilkynningu frá Wise segir að fyrirtækin muni starfa bæði í Ofanleiti 2 í Reykjavík og Hafnarstræti 91 á Akureyri. Það sem áður var Þekking verði nú nýtt rekstrarþjónustusvið Wise, sem Gerður Björt Pálmarsdóttir muni stýra.

Gerður hafi síðastliðið ár gegnt starfi forstöðumanns Customer Success hjá Wise. Þar hafi hún borið ábyrgð á þjónustustefnu Wise, mótun þjónustuferla og ýmsum breytingum til að stuðla að bættri þjónustu og tengslum við viðskiptavini. Gerður hafi síðustu tuttugu ár starfað á sviði upplýsingatækni, þjónustustjórnunar, gæða- og mannauðsmála. Hún hafi mikla reynslu á sviði verkefnastjórnunar, stefnumótunar, gerð verkferla, árangurs- og þjónustumælinga.

Spennandi verkefni framundan

Áður en Gerður gekk til liðs við Wise hafi hún starfað sem gæðastjóri hjá fjártæknifyrirtækinu Five Degrees og séð þar um gæðamál og úttektir á skýjalausnum félagsins ásamt því að gegna hlutverki scrum master/team lead í Matrix SaaS teymi félagsins. Árin þar á undan hafi hún starfað sem deildarstjóri viðskiptaþjónustu hjá lyfjaheildsölu Distica og borið þar ábyrgð á framlínuþjónustu félagsins, viðskiptatengslum og þróun stafrænna lausna ásamt þjónustu við viðskiptavini. Gerður sé viðskiptafræðingur að mennt, hafi lokið meistaragráðu í mannauðsstjórnun og mini MBA í stafrænni umbreytingu.

„Ég er ákaflega stolt og þakklát fyrir það traust sem mér er sýnt og hlakka gríðarlega mikið til að takast á við öll þau spennandi verkefni sem framundan eru. Sameinað félag byggir á sterkum grunni Wise og Þekkingar og við erum á fleygiferð inn í framtíðina. Við höfum þarfir viðskiptavina að leiðarljósi og getum nú boðið heildstætt lausnaframboð á sviði upplýsingatækni til að styðja viðskiptavini okkar á stafrænni vegferð þeirra,“ er haft eftir Gerði í fréttatilkynningu.

Að mörgu að hyggja

Stefán Jóhannesson, fráfarandi framkvæmdastjóri Þekkingar, muni leiða sameiningarferlið sem er framundan. 

„Það er að mörgu að hyggja við svona sameiningu. Mitt hlutverk verður að sjá til þess að allt skili sér í hús og viðskiptavinir upplifi sig í öruggum höndum. Þegar allt verður komið saman munum við sjá verulegan ávinning fyrir alla aðila,“ er haft eftir honum.