Finnur Freyr getur jafnað met Frið­riks Inga í kvöld

Valur fær þá Grindavík í heimsókn á Hlíðarenda í hreinum úrslitaleik um Íslandsmeistaratitilinn í Subway deild karla í körfubolta. Það er löngu orðið uppselt á leikinn en hann verður sýndur beint á Stöð 2 Sport og hefst upphitun klukkutíma fyrir leik eða klukkan 18.15.

Finnur Freyr hefur stýrt liðum sínum til sigurs í 72 leikjum í úrslitakeppninni. Friðrik Ingi vann 73 leiki í úrslitakeppni á sínum tíma.

Friðrik Ingi vann 73 af 128 leikjum sínum sem gerir 57 prósent sigurhlutfall.

Finnur hefur unnið 72 leiki og aðeins tapað 29 leikjum. Það gerir ótrúlegt 71 prósent sigurhlutfall.

Finnur tók fram úr Sigurði Ingimundarsyni hvað varða fjölda sigurleikja fyrr í þessari úrslitakeppni en Sigurður er þriðji með 68 sigurleiki í úrslitakeppni.

Finnur hefur þegar tekið metið af Sigurði yfir flesta Íslandsmeistaratitla þjálfara eftir úrslitakeppni en það gerði hann með því að vinna sinn sjötta titil með Valsmönnum árið 2022.

Finnur er enn fremur kominn með sjö sigurleikja forskot á næsta mann yfir flesta sigurleiki þjálfara í lokaúrslitum um Íslandsmeistaratitilinn.