Stjörnufans á Nesinu og for­seta­hjónin skella sér í pottinn

Heimsóknin hefst klukkan 07:40 í Sundlaug Seltjarnarness þar sem Þór Sigurgeirsson bæjarstjóri tekur á móti forsetahjónum og fara þau í heita pottinn saman ásamt fastagestum laugarinnar. Að því loknu heimsækja forsetahjón bæjarskrifstofur Seltjarnarnesbæjar þar sem þau njóta morgunkaffis með starfsfólki og fá kynningu á uppbyggingu og helstu verkefnum bæjarins um þessar mundir. Þá ávarpar forseti hátíðarfund bæjarstjórnar í tilefni 50 ára afmælisins.

Forsetahjón munu að því loknu heimsækja fjölda stofnana og fyrirtækja á Seltjarnarnesi til að fræðast um bæjarlífið og ræða við íbúa. Byrjað verður í Mýrarhúsaskóla, Valhúsaskóla og leikskólanum Mánabrekku. Lúðrasveit tónlistarskólans leiðir göngu milli lóðanna og við Mánabrekku sameinast leikskólabörn og syngja fyrir forsetahjón og föruneyti.

Því næst heimsækja hjónin nýsköpunarhúsið Innovation House og Vivaldi á Eiðistorgi og fá þar kynningu á starfsemi ungra frumkvöðla og sprotafyrirtækja sem þar hafa aðstöðu. Þaðan verður gengið yfir á Bókasafn Seltjarnarness og þar sem opnuð verður sýningin „Stiklað á stóru um sögu Seltjarnarness“. Nokkrir Seltirningar segja frá minningum sínum af uppbyggingu bæjarins og forseti ávarpar gesti.

Þegar líður að hádegi verður haldið í skoðunarferð út í Gróttu. Á leiðinni verður Seltjarnarneskirkja heimsótt og komið við í góðgerðarversluninni Elley auk þess sem numið verður staðar við hitaveituhúsið, hákarlahjallinn og listaverkið Bollastein. Því næst verður fjaran gengin út í Gróttu, náttúran og húsin í eyjunni skoðuð auk þess sem farið verður upp í Gróttuvita. Þá verður hádegisverður snæddur á veitingastaðnum Ráðagerði.

Eftir hádegi heimsækja forsetahjón hjúkrunarheimilið Seltjörn og síðan safnasvæðið þar sem þau skoða verðandi Náttúruhús, Lyfjafræðisafnið. Þá verður Tónlistarskóli Seltjarnarness heimsóttur en þar mun Víkingur Heiðar Ólafsson vígja nýjan konsertflygil sem keyptur var í tilefni af 50 ára afmæli skólans. Forsetahjón heimsækja að því loknu félagsstarf í íbúðakjarna eldri bæjarbúa á Skólabraut og líta loks inn á síðdegisæfingum barna í íþróttahúsinu.

Opinberri heimsókn forsetahjóna til Seltjarnarness lýkur með þátttöku í afmælishátíð á Eiðistorgi þar sem blásið er til kl. 16:30 fyrir íbúa bæjarins. Þar verður boðið upp á afmælisköku og fjöldi tónlistarfólks frá Seltjarnarnesi kemur fram. Má þar nefna Jón Jónsson ásamt ungum tónlistarskólanemum, einnig Bubba Morthens og Jóhann Helgason ásamt Selkórnum auk hjónanna Helga Hrafns og Tinu Dickow. 

Eva María Jónsdóttir stýrir veislunni. Eftir því sem fréttastofa kemst næst gefa listamennirnir allir vinnu sína á þessum tímamótum bæjarins.

Forseti flytur hátíðarávarp og færir bæjarstjóra gjöf til bæjarins.