Kenna öryggisráðinu um „galnar“ kröfur Hamas

Benjamín Netanjahú, forsætisráðherra Ísrael, sagði í dag að leiðtogar Hamas hefðu lagt fram galnar kröfur sem sýndu að þeir hefðu ekki raunverulegan áhuga á viðræðum eða friðarsamkomulagi.

Heimildarmaður Reuters sem komið hefur að viðræðunum sakar Yahya Sinwar, leiðtoga Hamas-samtakanna, um að skemma viðræðurnar. Þær hafa að undanförnu snúist um sex vikna vopnahlé í skiptum fyrir fjörutíu af um 130 gíslum sem Hamas-liðar halda enn.

Þá ætluðu Ísraelar að sleppa um sjö til átta hundruð Palestínumönnum í sem þeir hafa í haldi.

Leiðtogar Hamas hafa samkvæmt Reuters viljað breyta samkomulaginu í varanlegt vopnahlé og að Ísraelar dragi allar hersveitir sínar frá Gasaströndinni og sleppi hundruðum Palestínumanna sem sitja í fangelsum, margir án dóms og laga. Gíslum samtakanna verði ekki sleppt fyrr en þá en því hafa Ísraelar neitað. Þeir segja að þeir muni á endanum halda áfram að brjóta Hamas-samtökin á bak aftur.

Halda sig við upprunalegar kröfur

Rúmlega 32 þúsund manns hafa fallið á Gasaströndinni frá því stríðið milli Ísrael og Hamas hófst í október, samkvæmt tölum heilbrigðisráðuneytis Gasa, sem Hamas-samtökin stýra. Aðstæður á Gasaströndinni fara sífellt versnandi og og stefnir í hungursneyð á svæðinu.

Sjá einnig: Er of seint að koma í veg fyrir hungur­sneyð?

Öryggisráð Sameinuðu þjóðanna samþykkti í gær ályktunartillögu um tafarlaust vopnahlé á Gasa og hefur það reitt ráðamenn í Ísrael til reiði. Sérstaklega þar sem árás Hamas-liða og annarra á Ísrael þann 7. október, þegar um 1.200 manns féllu og um 250 manns voru tekin í gíslingu, var ekki fordæmd í ályktuninni.

Sjá einnig: Netanjahú í fýlu við Biden

Í kjölfar þess að ályktunin var samþykkt höfnuðu leiðtogar Hamas friðartillögum sem lagðar voru fram af erindrekum Katar, Egyptalands og Bandaríkjanna. Leiðtogarnir sögðust ætla að halda sig við upprunalegar kröfur sínar um að Ísraelar hörfuðu alfarið frá Gasa.

Það sagði Netanjahú sýna að Hamas-liðar hefðu ekki áhuga á samningaviðræðum og sýndi hvernig ályktunin hefði komið niður á viðræðunum.

Ismail Haniyeh, pólitískur leiðtogi Hamas, var staddur í Íran í dag en samtökin fá bæði peninga og vopn þaðan. Þar sagði hann að ályktun Sameinuðu þjóðanna sýndi að einangrun Ísraelsríkis væri orðin fordæmalaus.

Ættingjar gísla mótmæltu

Nokkuð fjölmenn mótmæli voru haldin við höfuðstöðvar ísraelska hersins í Tel Aviv í kvöld en þar komu nokkur hundruð ættingjar gísla sem eru enn í haldi og aðrir saman. Minnst fjórir voru handteknir, samkvæmt frétt Times of Israel.

Mótmælendurnir kröfðust þess að ríkisstjórn Ísrael frelsaði gíslana og mótmælti því að viðræðunum hefði verið slitið.

Amit Soussana, sem var tekin í gíslingu af Hamas í árásinni 7. október og sleppt þann 30. nóvember, sagði frá því í viðtali við New York Times sem birt var í dag að hún hefði verið beitt kynferðislegu og líkamlegu ofbeldi. Hún hefði meðal annars verið barin og þvinguð til kynlífsathafna í haldi Hamas.

Leiðtogar Hamas hafa hafnað því að gíslar samtakanna séu beittir ofbeldi. Sameinuðu þjóðirnar gáfu þó út skýrslu fyrr í mars þar sem fram kom að sterkar vísbendingar bentu til þess að gíslar hefðu verið beittir kynferðislegu ofbeldi og þar á meðal nauðgunum.

Þá hefði slíkt ofbeldi einnig verið framið í árásinni í október. Konum hefði verið nauðgað og þær í kjölfarið myrtar. Þá hefðu lík minnst tveggja kvenna verið svívirt.

„Það eru enn nítján konur í gíslingu og það eru liðnir sex mánuðir,“ sagði einn mótmælandi við fjölmiðla í Ísrael í kvöld. „Þær eru að ganga í gegnum svo mikið, það er sárt að ímynda sér það. Ein kona sagði okkur hvað hún upplifði þarna. Hvað eru hinar nítján að upplifa?“