Safna fyrir lit­ríkri endur­komu Lilla tígurs

Þau Grettir og Þórhildur skelltu sér í viðtal um málið hjá Ósk Gunnars á FM957 í gær. Í samtali við Vísi segir Þórhildur að þau Grettir séu vongóð um söfnunin muni takast en þó sé enn nokkuð í land þegar einungis fjórir dagar eru eftir af söfnuninni inni á vef Karolina Fund.

Leikur sér mest með Lilla tígur

Rúm tvö ár eru síðan Grettir gaf út fyrsta þáttinn um Lilla tígur á Youtube. Þau mæðgin söfnuðu á fyrir gerð fleiri þátta og eru þættirnir um tígurinn nú sýndir í línulegri dagskrá á Stöð 2 og á streymisveitunni Stöð 2+.

Grettir segir á FM957 að hann leiki sér enn mest með Lilla tígur. Spurður hvort þarna sé bangsi á ferðinni þá svarar Grettir því einfaldlega að hér sé á ferðinni tígrisdýr. Í þáttunum lendi Lilli tígur í ýmsum ævintýrum.

Hófst allt í veikindum

„Grettir hefur alltaf verið mikið fyrir dýr. Svo þegar systir hans var nýfædd og Grettir búinn að vera veikur heima í þrjá daga þá datt okkur í hug að prófa að búa eitthvað til úr dótinu hans,“ segir Þórhildur. Hún útskýrir að þeim hafi fundist vera skortir á barnaefni á íslensku á Youtube.

Grettir hafi sótt lítið leikfangatígrisdýr en frændi hans var nýbúinn að eignast bengalkött á þessum tíma og segir Þórhildur að sig gruni að það hafi haft áhrif á valið á aðalpersónunni. Síðan hafi Grettir brugðið á leik og sagt sögu sem tendist leikmyndinni sem hann sjálfur stillti upp.

„Svo prófuðum við að deila myndbandinu á Facebook og við fengum þvílík viðbrögð og fólk vildi meira. Þá fórum við af stað með söfnun á Karolina Fund og úr varð tíu þátta sería þar sem Grettir stjórnaði alveg ferðinni.“

Einn litur tekinn fyrir í hverjum þætti

Þórhildur útskýrir að markmiðið með nýju þáttunum verði að efla hugmyndaflug áhorfenda og gefa þeim nýjar hugmyndir að leikjum í hverjum þætti sem hægt er að leika eftir heima eða með vinum. Í þetta sinn verða þær mæðgur Fanney Ragna Gröndal og dóttir hennar Elma Örk Johansen með í gerð þáttanna um Lilla tígur.

„Núna ætlum við að taka fyrir alla litina tíu í litalaginu. Þannig að núna erum við að safna fyrir þáttaröð þar sem litirnir verða þemað. Fyrsti þátturinn er tilbúinn, hann er í gulu þema,“ útskýrir Þórhildur.

Leika krakkarnir sér fyrst og fremst með sitt eigið dót. „Grettir og Elma fundu allt gula dótið sem þau gátu og í þessari seríu erum við svona að virkja krakkana. Þegar þetta byrjaði átti þetta aldrei að snúast um bara að halda börnunum alveg við sjónvarpið, við höfum alltaf verið að reyna að efla börnin sjálf í sköpun.“

Söfnunina má finna á vef Karolina Fund.