Rétt­læti ekki hvernig sum hafi leyft sér að tala um Heru

Þetta kemur fram í Facebook færslu Alexöndru. Þar segist hún skilja að margir séu vonsviknir yfir úrslitunum í gær þar sem Hera fór með sigur af hólmi eftir einvígi gegn Bashar. Hún segist sjálf vera vonsvikin.

„Það að senda Bashar hefðu verið sterk skilaboð og hefðu getað verið leið fyrir hluta þjóðarinnar til þess að fylgjast með keppninni í ár þrátt fyrir þátttöku Ísraels, vegna þess að framlag Íslands hefði verið að senda þeim mjög skýrt hvað okkur finnst.“

Alexandra segist sjálf ekki viss um að það hefði dugað sér miðað við það sem er í gangi í Palestínu. En hún skilur að fólki hafi fundist það ágætis lausn.

Réttlætir ekki illt tal um Heru

„Án þess, þá er þetta mjög einfalt. Við fylgjumst ekki með keppninni, förum ekki í Eurovisionpartý og tökum ekki þátt í símakosningu. Að öllu þessu sögðu, þá réttlætir það ekki hvernig sum hafa leyft sér að tala um Heru.“

Alexandra segir Heru vera góða söngkonu og góða manneskju. Þó svo að einhver af þeim sem kusu hana hafi haft það sérstaklega sem leiðarljós að senda ekki Bashar, eða önnur furðuleg sjónarmið, sé líka fólk sem finnist hún frábær og hafi viljað senda hana.

„Hún má keppa og reyna að vinna án þess að það sé litið á það sem einhverja sérstaka stuðningsyfirlýsingu við Ísrael. Þó að ég persónulega myndi ekki vilja fara út og keppa við þessar aðstæður í hennar sporum, þá er það ekki skylda að vera sammála mér um það,“ segir Alexandra.

„Við getum verið vonsvikin með að fá ekki tækifærið til að senda skilaboðin sem við vildum án þess að gera það svona hatrammt gegn henni persónulega, og það að láta þannig gegn henni grefur undan málstaðnum og lætur okkur líta illa út. Við sjáum hversu fullkomlega ógeðfellt það er hvernig verstu týpurnar hafa leyft sér að tala um Bashar, förum ekki niður á það plan. Verum betri. Það er þá bara sniðganga á keppnina, sem var hvort eð er plan A.“