Hera og Bashar af­dráttar­laus og ætla í Euro­vision

Hera var meðal þriggja atriða sem komust áfram á seinna undanúrslitakvöldinu á laugardaginn. Sigga Ósk og Bashar tryggðu sig sömuleiðis áfram. Aníta og strákarnir í VÆB höfðu tryggt sér farseðilinn á lokakvöldið fyrra undanúrslitakvöldið.

Hera segist í færslu á Facebook vita að fólk hafi ólíkar skoðanir á því hvort Ísland eigi að vera með í Eurovision. Þær skoðanir eigi rétt á sér.

„Ég hef tekið einn dag í einu með RÚV í þessu ferli, oft við það að stökkva af vagninum vegna þrýstings en mallakútsmælirinn (my gut feeling) & blessuð lífsreynslan hélt mér við verkefnið,“ segir Hera.

Ljóst er að undanfarnar vikur og mánuðir hafa ekki verið auðveldir fyrir keppendur og skipuleggjendur vegna pressu að fara ekki í lokakeppnina. Magnús Jónsson, leikari og fyrrverandi liðsmaður GusGus, var á meðal tíu keppenda en ákvað að draga sig úr keppni vegna umræðunnar.

Hera segir að hennar meðfæddu skemmtikraftar séu hennar bestu verkfæri til að breyta einhverju örlitlu í heiminum.  Fyrir vikið hafi hún ákveðið að klæða sig í kærleiksgallann og halda ótrauð áfram.

„Út vil ek & tek sko Úllu frænku með mér,“ segir Hera sem keppti fyrir hönd Íslands í Eurovision árið 2010.

„Ég vil syngja minn söng fyrir alla sem vilja hlusta því ég trúi því í einlægni að tónlistin sé besta leiðin til að ná tengingu og lyfta okkur upp frá óttanum. Soldið væmin, ögn dramatísk & fullkomlega hreinskilin á þessu sunnudagskvöldi en hey…þetta er minn söngleikur & ég trúi á hann.“ 

Bashar sagði í ítarlegu viðtali við Vísi á dögunum að það væri draumur hans að keppa í Eurovision.

Hann áréttaði þetta í viðtali við RÚV í gær.

„Það er draumur minn að koma með Eurovision til Reykjavík 2025. Ég er draumóramaður, og sem Palestínumaður hefur mig alltaf dreymt að syngja á stóra sviðinu, því vil ég að draumurinn lifi áfram.“

Hávær krafa hefur verið um að Ísland sniðgangi Eurovision og taka þannig afstöðu gegn Ísrael í árásum þeirra á Palestínu undanfarna mánuði. Fleiri hundruð íslenskir tónlistarmenn skrifuðu undir áskorun til RÚV um að sniðganga Eurovision í ár. Útvarpsstjóri tilkynnti í kjölfarið að ákvörðun um það hvort Ísland keppti í Eurovision í Malmö í maí yrði ekki tekin fyrr en að lokinni Söngvakeppninni og í samráði við siguregarann. Enginn yrðu neyddur til að keppa.

Nokkur óvissa ríkir með þátttöku Ísraels í keppninni vegna texta við framlag þeirra þar sem minnst er á októberregn. Hryðjuverkaárás Hamas-liða á Ísraela var gerð 7. október en dæmi eru um að þjóðir hafi ekki fengið að taka þátt í Eurovision vegna pólitískra skilaboða í atriðum sínum eða lögum. 

Pólitískur boðskapur er sömuleiðis bannaður í Söngvakeppninni og má telja líklegt að það sé ástæðan fyrir því að melóna, sem Bashar var með í atriði sínu, sást ekki vel í beinni útsendingu á laugardagskvöldið á RÚV. Melóna hefur verið notuð sem tákn til að sýna samstöðu með Palestínu en sömu litir eru í vatnsmelónu og Pelaestínska fánanum.

Strákarnir í VÆB sögðust ekki vera búnir að ákveða neitt.

„Við gerum það í samráði við RÚV ef við vinnum.“

Afstaða Anítu og Siggu Ózkar kom ekki fram í umfjöllun RÚV í gær. Samkvæmt veðbönkum er Íslands í fjórða sæti yfir þjóðir líklegastar til að bera sigur úr býtum. Þeim spádóm ætti að taka með fyrirvara enda enn óljóst hvert framlag Íslands og fleiri þjóða verður.

Lögin verða flutt í þessari röð á laugardaginn: Bíómynd - VÆB, Scared of Heights - Hera Björk, Downfall - ANITA, Wild West - Bashar Murad og Into The Atmosphere - Sigga Ózk.