Sam­mála um á­fram­haldandi stuðning við UNRWA

Gréta Gunnarsdóttir yfirmaður sendiskrifstofu stofnunarinnar í New York sagði í morgun starfsemi stofnunarinnar falla um sjálfa sig í lok mánaðarins ef þau ríki sem ætla sér að fresta framlögum til stofnunarinnar láta verða af því.

Tvær milljónir manna á Gasa reiða sig á stofnunina sem er stærst alla hjálparsamtaka á Gasa. Almenningur og aðrar hjálparstofnanir reiða sig á UNRWA á Gasa. Auk þess að starfa þar starfar hún á Vesturbakkanum í Palestínu og í Jórdaníu og Sýrlandi.

Utanríkisráðherra tilkynnti nýlega að framlög til stofnunarinnar yrðu settar á stopp á meðan rannsökuð er aðild um tólf eða þrettán starfsmanna stofnunarinnar að hryðjuverkum Hamas í Ísrael þann 7. Október.

Gréta og þingmennirnir þrír ræddu málið í Sprengisandi á Bylgjunni í morgun. Orri Páll hóf umræðuna og sagði það morgunljóst að stofnunin væri lykilstofnun á Gasa.

„Þetta er algjört bakbein og miðað við þær hörmungar sem þarna geisa, og miðað við getuleysi alþjóðasamfélagsins að stíga inn og stöðva það. Þá getum við ekki treyst á annað en á alþjóðastofnanirnar okkar,“ sagði hann og að við yrðum að halda áfram stuðningi við UNRWA þrátt fyrir rannsókn á aðild nokkurra starfsmanna að hryðjuverkaárásum Hamas í Ísrael. Hann vildi ekki gera lítið úr ásökunum en sagði málið vera til rannsóknar.

Afleitt að ákvörðun hafi verið tekin án samráðs

„En í tilfelli þeirra tveggja milljóna, rúmlega, sem eru þarna hraktar fram og tilbaka í þessu lokaða stærsta fangelsi heims þá á það fólk að njóta vafans.“

Þegar Bjarni Benediktsson, utanríkisráðherra, tilkynnti um ákvörðun sína gagnrýndi Hafdís Hrönn að ekkert samráð hefði verði haft við utanríkismálanefnd. Spurð um sína afstöðu í dag sagði hún afleitt að ákvörðunin hefði verið tekin án samráðs.

Hún hefði kosið að utanríkismálanefnd hefði fengið upplýsingar um þetta svo hægt væri að ræða þetta áður en tilkynnt var um hana.

„En eins og ég segi, þá finnst mér mjög mikilvægt að við höldum áfram þessum stuðningi og að þetta mál verði ekki til þess að þetta fólk, sem er í rosalega viðkvæmri stöðu, verði fyrir skaða af því að þessir starfsmenn UNRWA hafi gert það sem þeir gerðu.“

Aukin skylda á utanríkisráðherra

Sigmar sagði hvíla aukna lagaskyldu á utanríkisráðherra að eiga samráð við utanríkismálanefnd og að allt sem viðkemur viðbrögðum yfirvalda hvað varðar Ísrael og Palestínu kalli á að slíkt samráð sé átt. Hann telur að Bjarni hefði ekki átt að taka þessa ákvörðun svo fljótt. Þá sagði hann þetta sérstaklega bagalegt því Alþingi hafi nýlega samþykkt ályktun um aukna mannúðaraðstoð á Gasa og stöðvun átaka.

Spurð hvaða afleiðingar þessi ákvörðun hefði sögðu bæði Orri Páll og Hafdís, sem tilheyra flokkum sem eru í ríkisstjórn, að það hefði komið fram að lokaákvörðun hefði ekki verið tekin. Framlögin gætu enn borist á réttum tíma og það hafi engin endanleg ákvörðun verið tekin um að hætta að styrkja stofnunina.

Spurð hvað gerist ef að rannsókn leiði það í ljós að starfsmenn UNRWA hafi verið viðriðnir hryðjuverkaárásina í Ísrael þann 7. Október sé það ný staða sem þurfi að takast á við. Það voru Hafdís og Orri Páll sammála um.

„Fólkið verður að fá að njóta vafans og viðbrögð Sameinuðu þjóðanna í þessu máli hafa verið mjög trúverðug og við verðum að treysta því að það verði leitt til lykta með skýrum hætti,“ sagði Hafdís Hrönn.

Hún sagði að á sama tíma væri það afleitt að almenningur á Gasa þurfi öll að þjást vegna ákvarðana nokkurra starfsmanna stofnunarinnar.

Sigmar tók undir það og sagði mjög mikilvægt að missa ekki sjónar á því sem við þurfum að gera. Sem sé að aðstoða fólk sem sé „verið að sprengja í tætlur“. Það sé ekki hægt að skera niður stuðning án þess að eiga um það samtal á réttum vettvangi. Hann gagnrýndi það mjög hvernig utanríkisráðherra fór fram í málinu og sagði það draga úr trúverðugleika að hann hafi ekki rætt málið við aðra ráðherra í ríkisstjórn eða formenn annarra flokka í ríkisstjórn.

Sigmar sagði fulla ástæðu fyrir ráðherra til að eiga meira og betra samstarf um þessi mál.

„Þarna var það bara þannig að utanríkisráðherra hljóp á sig. Hann gerði þetta í trássi við vilja Alþingis. Hann gerði þetta í trássi við samstarfsflokka sína í ríkisstjórn og mér finnst hann bara eiga að viðurkenna það,“ sagði Sigmar.

Hægt er að hlusta á viðtalið við þau Orra Pál, Sigmar og Hafdísi hér að ofan.