Grunaðir um mörg skartgriparán í heima­húsum

Málin sem um ræðir voru í Sjálandi í Garðabæ þar sem þrjú innbrot áttu sér stað, sami fjöldi var í Lundi í Kópavogi. Þá var brotist inn í fjórar íbúðir í Neðsta- og Ofanleiti. Skúli Jónsson aðstoðaryfirlögregluþjónn hjá lögreglunni á höfuðborgarsvæðinu segir að það sem einkenni ránin sé að þjófurinn eða þjófarnir róti mikið í íbúðunum. 

„Fólk saknar aðallega skartgripa og fjármuna eftir ránin,“ segir Skúli. 

Handabrögð þjófanna séu svipuð í flestum málanna. Þannig höfðu íbúðirnar  verið mannlausar um tíma áður en brotist var inn í þær. Þær voru langflestar í fjölbýli á fyrstu hæð. Þjófarnir byrjuðu á að fara bakvið hús og  inná á sólpall viðkomandi íbúðar. Þar spenntu þeir upp svalahurð eða glugga og komust inn. 

Skúli segir slík rán árstíðabundin. 

Lögreglunni hefur ekki tekist að hafa hendur í hári ræningjans eða ræningjanna. Skúli segir allar ábendingar vel þegnar.

„Ef fólk er að sjá einhverjar grunsamlegar mannaferðir eða bílferðir  hringiði bara strax ekki bíða með það. Láttu okkur um að greiða úr þessu. Það getur komið okkur á sporið að fá bara hluta úr bílnúmeri, tegund eða lit bifreiðar,“ segir hann. 

Ræningjarnir ekki hættir

Hann telur að ræninginn eða ræningjarnir muni aftur láta til skara skríða.

„Fólk þarf alltaf að huga að sínum afbrotavörnum og ég er ekki viss um að hann sé hættur þessi,“ segir hann

Hann segir að því miður upplýsist aðeins hluti svona mála en vonast til klófesta þá sem standi að þessum ránum.

„Því miður þá náum við aðeins um þriðjungi innbrotsþjófa. En ég  að vonast til að ná einhverjum í þessum málum,“ segir hann.

Ráðleggur nágrannavörslu og ljós innan-og utandyra

Skúli ráðleggur fólki að fá nágranna til að líta eftir eignum sínum þegar það fer að heiman í lengri tíma og vera með góðar læsingar á hurðum og gluggum. Þá sé mikilvægt að vera með góða lýsingu innan-og utandyra.

„Það er t.d. ágætisvörn að vera með útiljós sem kviknar á við hreyfingu og tímastillt ljós innandyra,“ segir Skúli að lokum.