Avengers: Kang Dynasty í upp­námi eftir sak­fellingu Majors

Majors fór með hlutverk Kang í sjónvarpsþáttunum um Loka og í kvikmyndinni Ant-Man and the Wasp: Quantumania. Kang átti að vera stærsti óþokkinn í Multiverse-fasa Marvel og spila stórt hlutverk í fyrsta þætti lokakaflans, kvikmyndinni Avengers: Kang Dynasty.

Upptökur á Kang Dynasty áttu að hefjast á næsta ári en sýningu myndarinnar hefur verið frestað frá 2025 til 2026.

Samkvæmt Variety standa Kevin Feige og aðrir stjórnendur Marvel nú frammi fyrir valinu á milli þess að ráða nýjan leikara til að fara með hlutverk Kang í Avengers: Kang Dynasty eða hætta við þá mynd og fara aðrar leiðir til að ljúka Multiverse-fasanum.

Fallið þykir hátt fyrir Majors, sem var meðal eftirsóttustu leikara Hollywood áður en hann var handtekinn í mars. Hann hafði þá farið með annað aðahlutverkanna í Creed III og með aðalhlutverkið í Magazine Dreams.

Sýningu seinni myndarinnar var frestað í kjölfar handtökunnar.