Mikil spenna fyrir úrslitaþætti Kviss

Í úrslitaþættinum eigast við ÍR og ÍA. Lið ÍR er skipað þeim Gauta Þeyr Mássyni, sem er betur þekktur sem Emmsjé Gauti, og Viktoríu Hermannsdóttur, fjölmiðlakonu. Í liði ÍA eru þau Arnór Smárason, knattspyrnumaður, og Sigrún Ósk Kristjánsdóttir, fjölmiðlakona. 

Björn Bragi segir að liðin séu búin að vinna margar erfiðar viðureignir í leið sinni í úrslitaþáttinn og því sé von á mikilli spennu. 

Úrslitaþátturinn á morgun verður í beinni útsendingu á Stöð 2. „Úrslitin eru alltaf í beinni og það gefur extra krydd á spennuna sem mun skapast,“ segir Björn. 

Um 100 manns munu fylgjast með í salnum og segir Björn að það hafi verið fullbókað fyrir mörgum vikum. „Það skapast alltaf mikil stemming þegar við erum í beinni og ég get lofað áhorfendum heima í stofu miklu fjöri, spennu og gleði.“

Verða spurningarnar í úrslitaþættinum erfiðari en gengur og gerist? „Þær verða á svipuðum nótum og í síðustu viðureignum, fjölbreyttar, skemmtilegar og passlega erfiðar. Þetta eru svo góð lið, það eru tvær þaulvanar fjölmiðlakonur í sitthvoru liðinu og svo eru Gauti og Arnór með góðan X-factor.“

Úrslitaþáttur Kviss hefst strax að loknum kvöldfréttum Stöðvar 2 annað kvöld, klukkan 19:00.