Camilla Rut hættir jogginggallaframleiðslu

Þetta segir Camilla í samtali við fréttastofu. Hún segist hafa ákveðið að stöðva framleiðsluna með þeim framleiðanda sem hefur séð um að gera fyrir hana gallana og stíga aðeins til baka. Nú þurfi hún að sjá hvert framhaldið verður. Vegna vangavelta um framhaldið hefur Camilla tekið Instagram-síðu Camy Collections úr birtingu. 

Í júní síðastliðnum hóf Camilla Rut sölu á jogginggöllum hjá vefverslun sinni Camy Collections. Gallarnir, það er að segja joggingbuxur og peysa í stíl, eru það eina sem eru til sölu hjá versluninni núna. Mikil óánægja var með gæði gallanna þegar þeir skiluðu sér í hendur neytenda og væst um Camillu vegna þessa.

Treysti nýrri verksmiðju til að inna verkið af hendi

Umræða spratt upp um gallana á samfélagsmiðlum strax og þeir fóru í dreifingu og kvörtuðu margir undan því að efnið hnökraðist án mikillar notkunar eða þvotts. Þá kvörtuðu margir undan því að engan miða væri að finna inni í göllunum, hvorki með þvottaleiðbeiningum né öðrum upplýsingum. 

DV fjallaði um málið í október þegar Camilla tjáði sig um kvartanirnar. Sagði Camilla þá frá því að hún hefði í góðri trú valið sér saumastofu til að sjá um að gera gallana og hluti sendingar frá stofunni verið gallaður.  

„Gæðin eru allt önnur í hluta af sendingunni heldur en ég var búin að samþykkja, [öðruvísi en prufan sem ég fékk]. Það eru ekki gæði sem ég var tilbúin að sætta mig við. Þannig ég hafði samband við verksmiðjuna og lýsti yfir óánægju minni þar og þau báðust innilega afsökunar og lofuðu öllu fögru og þau ætluðu að senda mér aðra sendingu til að bæta upp fyrir gölluðu eintökin. En því miður var skaðinn skeður og margir búnir að fá til sín gölluð eintök,“ hefur DV eftir Camillu í umfjöllun sinni. 

Camilla segir í samtali við fréttastofu að það hafi verið visst högg fyrir sig hvernig gæði gallanna reyndust vera þegar þeir skiluðu sér til neytenda. Hún sé nú búin að endurgreiða öllum þeim sem fengu gallaða galla í hendurnar og íhugi næstu skref á meðan hún nýtur jólanna með fjölskyldunni.